Սյուզի Կենտիկյանը ծրագրում է մրցապայքար անցկացնել Հայաստանում
ՀՀ սփյուռքի նախարար Հրանուշ Հակոբյանը Գերմանիայից ժամանած WBA, WIBF և WBO վարկածներով կին-պրոֆեսիոնալների շարքում գերթեթև քաշային կարգում բռնցքամարտի աշխարհի չեմպիոն հայազգի Սյուզի Կենտիկյանի հետ հանդիպման ժամանակ ողջունել է պատմական հայրենիքում իր մրցապայքարներից մեկն անցկացնելու մարզուհու մտադրությունը։
Ինչպես երեքշաբթի «Նովոստի-Արմենիա» գործակալությանը հաղորդեցին նախարարության մամուլի ծառայությունից, Հակոբյանը շնորհակալություն է հայտնել Գերմանիայի Դաշնային Հանրապետությանը, որ օտարերկրացիներին հնարավորություն է տալիս այնպիսի հաջողությունների հասնել, ինչպես դա արել է մեր հայրենակից Սյուզի Կենտիկյանը:
Չեմպիոնուհու մենեջեր Քրիստոֆ Վեշեն իր հերթին նշեց, որ Գերմանիայի քաղաքական էլիտան հետաքրքրված է հայուհի բռնցքամարտիկով: Վեշերը նշեց նաև, որ ինքը` որպես Սյուզիի մենեջեր, շահագրգռված է, որ վերջինը հնարավորությունների սահմաններում մասնակցի նաև Հայաստանում կազմակերպված ծրագրերի` այդպիսով ամրապնդելով Հայաստան-Գերմանիա կապերը: Նա նշեց, որ Գերմանիայի քաղաքական վերնախավը հետաքրքրությամբ է հետևում մարզուհու կարիերային։
Հանդիպման ժամանակ քննարկվեց նաև «Հայաստանի կյանքի ծառ» (Lebensbaum Armenien) նախագիծը, որի մասն է կազմում նաև Սյուզի Կենտիկյանը: Առաջարկվում էր նախագծում ընդգրկել ոչ միայն Հայաստանը, այլ ամբողջ աշխարհի հայությանը:
Սյուզի (Սյուզաննա) Կենտիկյանը ծնվել է 1987թ.-ին Հայաստանում։ 1992թ.-ին նրա ընտանիքը տեղափոխվել է Համբուրգ։ 2007թ.-ին Կենտիկյանը՝ հանդես գալով Գերմանիայի դրոշի տակ, պրոֆեսիոնալ բռնցքամարտի հայտնի կազմակերպությունների չեմպիոնական տիտղոսներ է նվաճել։ 2008թ.-ին նա Գերմանիայի քաղաքականություն է ստացել։
Ընթացիկ տարվա հուլիսի 17-ին Շերինում (Գերմանիա) մեքսիկուհի Արելի Մուչինոյի դեմ Կենտիկյանի պայքարը ժամանակից շուտ է ավարտվել։ Երրորդ ռաունդում անսպասելի բախման արդյունքում Կենտիկյանը գլխի վնասվածք է ստացել, և պայքարը դադարեցվել է։ Դատավորների որոշմամբ տեխնիկական ոչ-ոքի է հայտարարվել, ինչը նշանակում է, որ Կենտիկյանը պահպանում է իր տիտղոսները։ -0-
