Նովորոսիյսկի իշխանությունները հայերի գերեզմանների վնասված գերեզմանաքարերի վերականգնմանն ուղղված կոնկրետ միջոցառումներ են ձեռնարկում, փաստի առթիվ հարուցվել է քրեական գործ, երեքշաբթի հաղորդում է ՌԴ-ում ՀՀ դեսպանատան մամուլի ծառայությունը:
«ՌԴ արտգործնախարարության տեղեկատվության համաձայն,՝ ներքին գործերի մարմինները բացահայտել են, որ 2010 թ.-ի հուլիսի 23-24-ն անհայտ անձինք վնասել են 33 գերեզմանասալիկ, որոնցից 14-ը ազգությամբ հայերի գերեզմանաքարեր են եղել և 19-ը՝ սլավոնական ծագում ունեցող անձանց գերեզմանաքարեր: Այս փաստի առթիվ Նովորոսիյսկի իրավասու մարմինները հարուցել են քրեական գործ ՌԴ ՔՕ 244-րդ հոդվածի 1-ին մասով նախատեսված հատկանիշներով (գերեզմանաքարերի վնասում)», - նշվում է տեղեկատվության մեջ:
Ինչպես նշում է դեսպանատան մամուլի ծառայությունը՝ հղում անելով արտգործնախարարությունից ստացված տեղեկատվությանը, այժմ իրականացվում են հետաքննչական համալիր գործողություններ և օպերատիվ-հետախուզական միջոցառումներ, որոնք ուղղված են այդ հանցագործողությունների բացահայտմանը: Նմանատիպ հանցագործություններ թույլ չտալու նպատակով այժմ ներքին գործերի մարմիններն ուժեղացված պարեկություն են կազմակերպել գերեզմանոցների հարակից շրջաններում:
«Ելնելով ստացված տվյալներից՝ օբյեկտիվորեն հաստատվել է, որ նշված հանցագործողությունները չունեն ազգային երանգավորում, նշված է ՌԴ արտգործնախարարության տեղեկատվության մեջ», - նշվում է հաղորդագրությունում:
Դեսպանատան ունեցած տեղեկատվության համաձայն, Նովորոսիյսկի իշխանություններն այդ հանցագործությունների հետևանքները վերականգնելու կոնկրետ միջոցառումներ են ձեռնարկել:
ՌԴ-ում ՀՀ դեսպանատունն իր երախտագիտությունն է հայտնում ՌԴ արտգործնախարարությանը, Կրասնոդարի երկրամասի և Նովորոսիյսկ քաղաքի ղեկավարությանը՝ այս փաստի կապակցությամբ դեսպանատան հայցին արձագանքելու համար:
«Ռուսաստանի Դաշնությունում Հայաստանի Հանրապետության դեսպանատունը հաստատակամ վստահություն է հայտնում, որ այս միջադեպը ստվերի տակ չի դնի հայ-ռուսական փոխհարաբերությունների եղբայրական բնույթը և բարձր մակարդակը», - նշվում է Հայաստանի դեսպանատան տեղեկատվության մեջ:-0-
