Նկարիչ-աբստրակցիոնիստների առաջին գալա-ցուցահանդեսը կբացվի Երևանում օոգոստոսի 17-ին

Նկարիչ-աբստրակցիոնիստների առաջին գալա-ցուցահանդեսը կանցկացվի օգոստոսի 17-ից սեպտեմբերի 2-ը Երևանում, Հենրիկ Մալյանի անվան Ժամանակակից արվեստի թանգարանում, ուրբաթ «Նովոստի» միջազգային մամուլի կենտրոնում լրագրողներին ասաց հայ քանդակագործ և ինժեներ Գևորգ Գասապյանը։

Ըստ նրա, ցուցահանդեսին կներկայացվեն աշխարհի տարբեր երկրներում, մասնավորապես ԱՄՆ-ում, Կանադայում, եվրոպական երկրներում, ինչպես նաև Հայաստանում ապրող 25 հայ նկարիչների և երեք քանդակագործների 45 նկարներ և 10 քանդակ:

Գասապյանը նշեց, որ ցուցահանդեսը կանցկացվի Հայաստանի մշակույթի նախարարության աջակցությամբ՝ հույս հայտնելով, որ Սփյուռքի նախարարությունն էլ կառաջարկի իր աջակցությունը։

Նա հիշեցրեց, որ մեկ տարի առաջ իր նախաձեռնությամբ ստեղծվել է տարբեր երկրների հայ աբստրակցիոնիստների միություն և բացվել է http://armenianabstractartists.am/ կայքը։

Նկարիչ Խաչատուր Մարտիրոսյանն իր հերթին նշեց, որ ցուցահանդեսը ժամանակակից արվեստին հաղորդակից լինելու հնարավորություն կտա։

«Մեր հասարակությունը հաճախ տեղեկացված չէ վերացական մշակույթի և արվեստի մասին։ Արտերկրում բավական հայտնի հայ աբստրակցիոնիստ-նկարիչներին այստեղ չեն ճանաչում։ Մենք պետք է կարողանանք կենդանություն մտցնել, «կոտրել սառույցը»»,- ասաց Մարտիրոսյանը։

Նկարիչ Գարիկ Կարապետյանի խոսքերով, ցուցահանդեսի անցկացումը համընկել է Վասիլի Կանդինսկու կողմից աբստրակցիոնիզմի հիմնադրման 100-ամյակի հետ։

Նա ընդգծեց, որ աբստրակցիոնիզմը Հայաստանում գոյություն ունի մոտ 30 տարի, և գալա-ցուցահանդեսը թույլ կտա աբստրակցիոնիստներին գտնել իրենց արվեստի երկրպագուներին։ -0-