Արվեստի ամառային դպրոցն արվեստագետներ կպատրաստի

Հայաստանում Արվեստի ամառային դպրոցը ծրագրում է արվեստագետների ուսուցում կազմակերպել, հայտնեց Հայաստանի Արվեստի քննադատների ասոցիացիայի (AICA) նախագահ, Դպրոցի համակազմակերպիչ Նազարեթ Կարոյանը։

Ըստ նրա, Դպրոցը գործում է արդեն հինգ տարի, սակայն միայն այս տարվանից նրա գործունեությունը հիբրիդային դարձավ, քանի որ ավելի վաղ դպրոցի ձևաչափը սահմանափակվել է սեմինարների անցկացմամբ։

«Մենք շահագրգռված ենք այնպիսի մարդկանց ներգրավմամբ, ովքեր ունեն տնտեսագիտական, իրավաբանական կրթություն և շատ են սիրում արվեստը»,- ուրբաթ ասաց Կարոյանը «Նովոստի» միջազգային մամուլի կենտրոնում։

AICA-ի նախագահի խոսքերով, դա կառավարման, մենեջմենթի, արվեստի ստեղծագորոծություններ ունենալու հետ կապված բազմաթիվ խնդիրների լուծման հնարավորություն կընձեռի։ Կարոյանն ասաց, որ Ամառային դպրոցի ունկնդիրների հաջորդ ընտրությունը կանցկացվի 2010 թվականի հոկտեմբերին։

Ըստ նրա, Ամառային դպրոցի գործունեության նպատակը արվեստի միջոցով շրջակա աշխարհի ձևավորմանն աջակցելն է։

Այս կապակցությամբ AICA անդամ, Ամառային դպրոցի կազմակերպիչ Անժելա Հարությունյանն ընդգծեց, որ Դպրոցի շրջանավարտները ներկայում արվեստի ոլորտում գործող միջազգային նախագծերի, ինչպես օրինակ, բիենալեի և փառատոների մասնակիցներ են։

Հարությունյանն ավելացրեց, որ Ամառային դպրոցում անցկացվում են արվեստի պատմության, թարգմանության արվեստի դասընթացներ, ինչը հնարավորություն կտա վերացնել պատմամշակութային հուշարձանների հետ կապված թարգմանություններում տեղ գտած աղավաղումները։ -0-