Ճապոնիայի կառավարության կողմից Հայաստանին որպես օգնություն տրամադրված նոր հրշեջ մեքենաների շնորհանդեսը տեղի է ունեցել չորեքշաբթի Երևանի Հանրապետության հրապարակում:
Հանդիսավոր միջոցառմանը ՀՀ արտակարգ իրավիճակների նախարար Արմեն Երիցյանը բարձր է գնահատել ճապոնացի գործընկերների շարունակական աջակցությունը, որի շնորհիվ հանրապետությունը Ճապոնիայի կողմից 28 հրշեջ մեքենա է ստացել: Նա ավելացրեց, որ դրանցից չորսն արդեն հայ հրշեջ փրկարարների խմբի ուղեկցությամբ Ռուսաստան են ուղարկել հրդեհների դեմ պայքարելու համար:
«Հայաստանը որպես զարգացող երկիր մինչև հիմա իր վրա զգում է անցյալի բնական աղետների հետևանքները»,- նշեց նախարարը` երախտագիտություն հայտնելով ճապոնական կառավարությանը տեխնիկական և փորձագիտական աջակցություն, ինչպես նաև մարդասիրական և մարդկային վերաբերմունք ցուցաբերելու համար:
Ըստ նրա, ճապոնական մեքենաները թույլ կտան ուժեղացնել հրշեջ փրկարարական ջոկատները ոչ միայն մայրաքաղաքում, այլ նաև Հայաստանի տարածաշրջաններում:
Ճապոնիայի փոխդեսպան Մանաբու Միյագավան իր հերթին շնորհակալություն հայտնեց այն կողմերին և անձանց, ովքեր աջակցել են հայ-ճապոնական ծրագրի իրականացմանն ու տվյալ միջոցառման կազմակերպմանը: Ըստ նրա, տվյալ ծրագիրը Հայաստանի և Ճապոնիայի միջև բարեկամական հարաբերություններ ամրապնդելու ապացույց է:
Ութ մլն դոլար ընդհանուր արժողությամբ հրշեջ մեքենաները Երևան են հասցվել հայ-ճապոնական կառավարական համաձայնագրի շրջանակներում, որը ստորագրվել է 2009թ.-ի փետրվարին:
Դրանց թվում են` 30 մետր բարձրությամբ երկու հրշեջ ավտոամբարձիչ, հինգ հրշեջ ավտոցիստեռն՝ մինչև 10 տոննա ջրի և մինչև 1 հազար լիտր կրակմարիչի փրփուրի տարողունակությամբ, 19 ցիստեռն` մինչև 3,5 տոննա ջրի և մինչև 350 լիտր փրփուրի տարողունակությամբ, բացի այդ՝ արագ արձագանքման երկու հրշեջ մեքենա (մինչև հազար լիտր տարողությամբ), որոնք նախատեսված են Կոնդի, Նորագյուղի և դժվարանցանելի փողոցներով այլ հատվածների համար:
Հայաստանում են գտնվում նաև ճապոնացի մասնագետները, ովքեր 135 հայ հրշեջ փրկարարների համար նոր սարքավորումներով աշխատելու վերաբերյալ ուսուցման կուրս կանցկացնեն:
ՀՀ ԱԻՆ փրկարար ծառայության մարտական հաշվարկների ավտոպարկում կա 147 հրշեջ մեքենա, որոնցից 36-ը` Երևանում: -0-
