ԵՐԵՎԱՆ, 10 օգոստոսի. /Նովոստի-Արմենիա/. Լվովում շարունակվում է Հայկական եկեղեցական համալիրի վերականգնումը, հաղորդում է Analitika.at.ua-ն՝ հղում անելով ZAXID.NET-ին։
«Այս տարի եկեղեցու երկու դարպասների և ճակատի վերականգնմանը քաղաքային բյուջեից հատկացվել է 1,5 մլն գրիվեն։ Աշխատանքները կիրականացնի «Ստելա» ՍՊԸ-ն։ Այդ ֆիրման արդեն իրեն լավ է դրսևորել՝ աշխատակիցներն իրականացրել են Հայկական զանգակատան ռեստավրացիան»,- ճեպազրույցում հայտարարել է Լվովի քաղաքապետ Անդրեյ Սադովին։
Քաղաքագլուխն ընդգծել է, որ այս տարի պետբյուջեից մեկ կոպեկ անգամ չի տրամադրվել Լվովում ճարտարապետական հուշարձանների վերականգնմանը։
«Ընդհանուր մշակութային ժառանգություն» նախագծի շրջանակներում սկսվել են «Գողգոթա» փայտե խորանի վերականգնման աշխատանքները, որի վրա լվովցի և լեհ վարպետները կաշխատեն երկու տարի։
Լեհաստանի մշակույթի նախարարությունը 100 հազար զլոտի (250 հազար գրիվեն) է հատկացրել խորանի վերականգնման համար։ Ինչպես հայտնեց պատմական ժառանգության պահպանության վարչության պետ Լիլիա Օնիշչենկոն, Հայկական եկեղեցու համալիրում բավական թվով օբյեկտներ վերականգնման կարիք ունեն։
«Հայկական եկեղեցու երեք գավիթ, մասնավորապես, Լեսյա Ուկրաինկայի փողոցի անցումը դեպի Հայկական փողոց, հուշասյունը, որը պետք է նորոգեին պետբյուջեի միջոցներով, բայց, հավանաբար, այս տարի այն չի կարող վերանորոգվել, քանի որ պետբյուջեից միջոցներ չեն հատկացվել»,- նշել է Լիլիա Օնիշչենկոն։
«Ստելա» ՍՊԸ-ի տնօրեն Միխայիլ Գավրիկի խոսքերով, աշխատանքները նախատսվում է ավարտել այս տարի, թեև ըստ պայմանագրի, այդ օբյեկտը հաջորդ տարվա համար անցումային է համարվում։ «Ճակատի և դռնակի վերականգնումը պայմանականորեն բաժանված է 2 մասի՝ առաջին փուլ՝ պատերի, ճակատի, սյուների մաքրման նախապատրաստական աշխատանքներ, երկրորդ փուլ՝ քարի, սվաղի կորած մասերի վերականգնում։ Ծեփի ուսումնասիրման ընթացքում մենք հայտնաբերել ենք, որ մի քանի հատվածներում այն առանձնացել է պատից։ Օբյեկտի աշխատանքները մասնագետների մի մեծ թիմ կիրականացնի»,- նշեց Գավրիկը։
Լրագրողների այն հարցին, թե կպատժվի, արդյո՞ք, այն ֆիրման, որը 2007 թվականին վնաս է հասցրել Հայկական զանգակատանն ու երեկեցուն, Անդրեյ Սադովին ասել է. «Մենք մեծ հույսեր ունենք։ Ցանկանում ենք, որ մյուս ֆիրմաներն իմանան, որ նման բան անել պետք չէ։ Դատարանը պետք է նաև սահմանի վնասի այն չափը, որը պետք է վճարի ֆիրման»։ -0
