Հայ գեղանկարիչ Փարավոն Միրզոյանի աշխատանքներից 50-ը կցուցադրվի Սանկտ Պետերբուրգում

ԵՐԵՎԱՆ, 5 օգոստոսի./Նովոստի-Արմենիա/. ՀՀ ազգային պատկերասրահի տնօրեն, արվեստի վաստակավոր գործիչ, գեղանկարիչ Փարավոն Միրզոյանի անձնական ցուցահանդեսը կբացվի նոյեմբերի 3-ին Սանկտ Պետերբուրգում։

«Սանկտ Պետերբուրգի հայկական համայնքի 300-ամյակի շրջանակներում անցկացվող ցուցահանեսի ժամանակ կցուցադրվի իմ գործերից շուրջ 50-ը»,- հինգշաբթի լրագրողներին ասաց նկարիչը։

Միրզոյանը նշեց, որ իր՝ Լենինգրադի գեղարվեստական ակադեմիայի շրջանավարտի համար, Սանկտ Պետերբուրգի ցուցահանդեսը վաղեմի երազանք է և շատ ուրախ է այն իրականություն դարձնելու համար։

Նա ավելացրեց, որ իր աշխատանքների անձնական ցուցահանդեսը ծրագրված է նաև հոկտեմբերի վերջին Սերբիայում։

Փարավոն Միրզոյանը ծնվել է 1949թ.-ին Երևանում։ 1975թ.-ին ավարտել է Լենինգրադի Գեղարվեստի ակադեմիան։ ՀՀ նկարիչների միության անդամ է, 2002թ.-ից ՀՀ ազգային պատկերասրահի տնօրենն է։ Հանրապետության արվեստի վաստակավոր գործիչ է։ -0-