Տարվա ընթացքում Հայաստանի թմրամոլների թիվը 50%-ով աճել է. փորձագետ

2010թ.-ի հունվարի 1-ի դրությամբ, ըստ պաշտոնական տվյալների՝ Հայաստանում 1717 թմրամոլ է գրանցված, ինչը գրեթե 50 տոկոսով բարձր է անցյալ տարվա ցուցանիշների համեմատ, երեքշաբթի լրագրողներին հայտնեց ՀՀ Նարկոլոգիայի կենտրոնի տնօրեն, գլխավոր նարկոլոգ  Պետրոս Սեմերջյանը։

«Մենք ունենք պաշտոնական վիճակագրության տվյալները, որը տարվում է ըստ թմրամոլների թվի, ովքեր դիմել են բժշկական օգնության, ինչպես նաև ոչ պաշտոնական տվյալներ, որոնք ձևակերպվում են փորձագիտական հետազոտությունների անցկացման արդյունքում»,- երեքշաբթի մամուլի ասուլիսի ժամանակ տեղեկացրեց Սեմերջյանը։

Ըստ նրա՝ ոչ պաշտոնական տվյալների համաձայն, Հայաստանում հաշվառված է հինգից մինչև յոթ հազար թմրամոլ, ովքեր օգտագործում են, այսպես կոչված, ծանր թմրանյութեր, ևս 25 հազար մարդ օգտագործում է, այսպես կոչված, թեթև թմրանյութ, օրինակ, որոշ շրջաններում տարածված կանեփը։

Փորձագետն ավելացրեց, որ հիմնականում Հայաստանի թմրամոլները 25-35 տարեկան երիտասարդներ են, սակայն առաջին անգամ թմրանյութ օգտագործում են մինչև 25 տարեկան մարդիկ, այդ թվում դեռահասները։ Հետագայում, մի քանի տարի անց, երբ առողջության հետ կապված խնդիրներ են ծագում, նրանք բուժհաստատություններ են դիմում, և հենց այդ պատճառով, ինչպես բացատրեց նարկոլոգը, պաշտոնապես գրանցված թմրամոլների տարիքն ավելի բարձր է։

Սեմերջյանը նշեց, որ գրանցված թմրամոլների թվի աճի երկու պատճառ  գոյություն ունի՝ նրանց քանակի աճը և կենտրոն դիմողների թվի աճը։ Փորձագետը նաև նշեց, որ թմրամոլության աճը խիստ հայկական ֆենոմեն չէ, այդ վտանգի հետ բախվել են աշխարհի բոլոր երկրները։

Միաժամանակ նա տեղեկացրեց, որ Հայաստան թմրանյութերի հիմնական մատակարար երկիրը հարևան Իրանն է, որտեղից գալիս է ափիոնի հիմնական հոսքը։ Ինչ վերաբերում է կանեփին, ապա այն, ըստ Սեմերջյանի տվյալների՝ հայկական արտադրության է։ -0-