Ադրբեջանցիները հրդեհ են բորբոքել Հայաստանի և Նախիջևանի սահմանին. թերթ

Ադրբեջանցիները հրդեհ են բորբոքել Հայաստանի և Նախիջևանի սահմանին, գրում է «Հրապարակ» թերթը։

Պարբերականի տվյալներով, հրդեհը սկսվել է հուլիսի 31-ին, և այն մարել առայժմ չի հաջողվում։ Ներկայում հրդեհն ընդգրկել է տարածքի մոտ 100 հեկտարը։ Տեղեկատվության համաձայն, տուժածներ չկան։

Բաց տարածության, շոգի և քամու պատճառով կրակը տարածվում է մեծ արագությամբ և արդեն մոտեցել է հայկական տարածքներին։

Հրդեհի պաշտոնական պատճառը հայտնի չէ, սակայն ինչպես նշում են Նախիջևանի սահմանամերձ հայկական գյուղերի բնակիչները, հրդեհը բորբոքողներն ադրբեջանցիներն են, ովքեր հույս ունեին, թե հետագայում կրակը կտեղափոխվի հայկական դիրքեր։

Ինչպես գրում է թերթը, հրշեջներին չի հաջողվում մարել կրակն ադրբեջանական կողմից անընդհատ հնչող կրակոցների պատճառով։ Բացի այդ, տվյալ տարածքն ականապատված է, և հրշեջներին չի հաջողվում առաջ անցնել։ -0-