Հայ կանայք ավելի հաճախ ինքնասպանության փորձեր են կատարում շանտաժի նպատակով, որպեսզի ուշադրություն հրավիրեն իրենց և իրենց խնդիրների վրա, երկուշաբթի լրագրողներին ասաց հոգեբանական գիտությունների թեկնածու, Երևանի Բրյուսովի անվան պետական լեզվաբանական համալսարանի դոցենտ Կարինե Նալչաջյանը։
Վիճակագրական տվյալների համաձայն, 2010 թվականի առաջին կիսամյակում Հայաստանում արձանագրվել է կանանց ինքնասպանության 91 դեպք, ինչը հինգով շատ է նախորդ տարվա նույն ժամանակահատվածի ցուցանիշից։ Կանանց թվում ինքնասպանությունների փորձերի թիվը նույն ժամանակահատվածում կազմել է 60 դեպք, ինչը չորսով պակաս է 2009 թվականի առաջին կիսամյակի ցուցանիշից։ Ընդհանուր առմամբ, ինքնասպանությունների թիվը նշված ժամանակահատվածում կազմել է 317 դեպք, ինչը 25,8 տոկոսով ավելի է նախորդ տարվա նույն ցուցանիշից։
«Տղամարդիկ կանանցից հաճախ են ինքնասպանություն գործում։ Սակայն առկա է նաև հետևյալ օրինաչափությունը՝ ինքնասպանության փորձ կատարողների թվում կանայք մեծամասնություն են կազմում, և սա հոգեբանական բացատրություն ունի։ Երբ մարդը գնում է ինքնասպանության, միշտ չէ այս միտքը վերջնականապես ձևավորված լինում։ Կան համոզված ինքնասպաններ, ովքեր որոշել են կյանքին վերջ տալ, սակայն կան նաև այսպես կոչված շանտաժ-ինքնասպանություններ, թատերականացված ինքնասպանություններ»,- ասաց Նալչաջյանը։
Նա ընդգծեց, որ հայ հասարակությունում կանայք ավելի են հակված շփման, քան տղամարդիկ, ավելի հաճախ են կիսվում իրենց խնդիրներով, ինչը զգալիորեն կրճատում է ինքնասպանության դեպքերը։
Միաժամանակ սոցիոլոգ Հայկ Սահակյանը նշեց, որ տղամարդիկ ավելի են ինտեգրված հասարակությունում, քան կանայք, իսկ տղամարդկանց թվում ինքնասպանությունների մեծ թիվը նախևառաջ կապված է սոցիալական մեծ պատասխանատվության հետ։ -0-
