Երևան-Արտաշատ արագընթաց տակտային երթուղու գործարկումն է կայացել նախորդ շաբաթ օրը, հաղորդում է «Հարավկովկասյան երկաթուղի» ՓԲԸ մամուլի ծառայությունը։
Միջոցառմանը ներկա են եղել «ՀԿԵ» ՓԲԸ գլխավոր տնօրենի առաջին տեղակալ Մարատ Խակովը, Արարատի մարզպետի տեղակալ Աշոտ Մուրադյանը, Արտաշատի քաղաքապետ Գագիկ Մուրադյանը, Հայաստանի Ազգային Ժողովի պատգամավոր Վոլոդյա Բադալյանը։
Հյուրերին ներկայացվեց «Արտաշատ» կայարանի նորոգված շենքը, ծառայողական սենյակները, որտեղ տեղադրված են ժամանակակից օպտիկամանրաթելային սարքավորումներ։
«Աշխատանքների ընթացքում ավտոմատացվել են կայարանի սլաքային փոխանցումները, որակապես բարելավվել է ուղիների վիճակը, արագընթաց շարժման ապահովման մեջ ընդգրկվել են ժամանակակից տեխնոլոգիաներ։ Գնացքների երթի անվտանգության բարձրացման նպատակով Արտաշատ-Երևան հատվածում կառուցվել են նոր անցումներ, տեղադրվել են էլակտրաուղեփակոցներ, ինչպես նաև լրացուցիչ լուսավորություն։ Տվյալ տեղամասի ենթակառուցվածքի հետագա արդիականացումը թույլ կտա ճանապարհը կրճատել մինչև 25 րոպե»,- նշեց Մարատ Խակովը։
Միջոցառման շրջանակներում «ՀԿԵ» ՓԲԸ առավել աչքի ընկած աշխատակիցները պարգևատրվել են պատվոգրերով և դրամական պարգևներով։ Աշոտ Մուրադյանին և Գագիկ Մուրադյանին շնորհվել են երկաթուղային պատվավոր տոմսեր 1 և 2 համարներով։
Բացման արարողության ավարտին մասնակիցները ծաղիկներ են դրել հայ ազգային հերոս Գևորգ Շաուշի հուշարձանին, որը կայարանի շենքի առջև է կանգնեցվել Երկաթուղայինի օրվա տոնակատարության նախօրեին։
«Հայկական երկաթուղու» կոնցեսիոն կառավարումն իրականացնում է «ՀԿԵ» ՓԲԸ-ն՝ «Ռուսական երկաթուղիներ» ԲԲԸ-ի հարյուրտոկոսանոց դուստրը: ՀԿԵ-ն իր բալանսում ընդունել ՀԵ շարժակազմը 2008թ. հունիսի մեկից՝ «Հայկական երկաթուղի» պետական ՓԲԸ-ն 30 տարի ժամկետով փոխանցման, կողմերի փոխադարձ համաձայնությամբ ևս 10 տարի երկարացման իրավունքով 2008թ. փետրվարի 13-ի կոնցեսիոն պայմանագրին համապատասխան։--0—
