Գաֆեսջյան արվեստի կենտրոնի ընդհանուր այցելուների թիվը 2010 թվականի հունվար-հունիս ամիսներին գերազանցել է 500 հազ.-ը, տեղեկացնում են Կենտրոնի մամուլի ծառայությունից:
«Գաֆեսջյան թանգարանը, որը բացվել է գրեթե մեկ տարի առաջ, այժմ ոչ միայն Հայաստանի կարևորագույն տեսարժան վայրերից է, այլև մշակութային և հանրային միջոցառումների իրական կիզակետ», - ասաց Գաֆեսջյան արվեստի կենտրոնի գործադիր տնօրենի պաշտոնակատար Վահագն Մարաբյանը։
Այդ ընթացքում կենտրոնն իրականացրել է 50-ից ավելի ծրագրեր, այդ թվում Թանգարանային գիշերը, երբ մայիսի 18-ին մոտ 10 հազ. այցելուներ կարողացան ազատ վայելել ցուցադրությունը, կենդանի հնչողությամբ համերգային ծրագիրը։
«Մեծ Եղեռնի 95-րդ տարելիցին կազմակերպվեց հատուկ մի միջոցառում` նվիրված մեծանուն ամերիկահայ նկարիչ և Եղեռնի ականատես Արշիլ Գորկու ստեղծագործական կյանքին և արվեստին»,- ասաց Մարաբյանը:
ունիսի 1-ին՝ Երեխաների պաշտպանության միջազգային օրը, թանգարանն ընդունեց շուրջ 50 հազ. մասնակից: Երեխաների համար այդ օրը կազմակերպվեցին արվեստի տարբեր խմբակներ, բեմադրություններ: Բացօթյա համերգը ավարտվեց տպավորիչ հրավառությամբ:
Այս տարվա առավել նշանակալի իրադարձություններից էր ԱՄՆ պետքարտուղար Հիլարի Քլինթոնի այցելությունը Գաֆեսջյան կենտրոն։ ԱՄՆ պետքարտուղարը թանգարանն «արվեստի զարմանահրաշ կենտրոն» անվանեց:
Գաֆեսջյան արվեստի կենտրոնը շարունակելու է իր միջոցառումները ողջ ամռան ընթացքում: Ընթացիկ միջոցառումների թվում է դասական երաժշտության համերգաշարը, որը տեղի է ունենում Հատուկ միջոցառումների սրահում յուրաքանչյուր չորեքշաբթի, ինչպես նաև Արշիլ Գորկու ցուցահանդեսի եզրափակիչ շաբաթը: Նշենք, որ մինչև օգոստոսի 1-ը Արշիլ Գորկու ցուցահանդեսի մուտքը կլինի անվճար:
Գաֆեսջյան արվեստի Երևանյան կենտրոնը, որը բացվել է 2009 թվականի նոյեմբերին, աշխարհի ժամանակակից արվեստի առաջատար կենտրոններից է։ Ավելի քան 11 քառակուսի մետր մակերեսով համալիրը բաղկացած է Այցելուների կենտրոնից, թանագարան-խանութից, Հատուկ միջոցառումների սրահից և ցուցադրությունների տարածքից։
Կենտրոնը կրում է հիմնադրի՝ ամերիկացի ձեռնարկատեր և բարերար Ջերարդ Գաֆեսջյանի անունը։
Գաֆեսջյան կենտրոնի «Կասկադ» ճարտարապետական համալիրի պուրակի մոտակայքում տեղադրված քանդակների այգում հավաքված է մոնումենտալ քանդակների՝ աշխարհի լավագույն հավաքածուներից մեկը։
Պուրակը և ծաղիկներով ձևավորումը ժամանակակից միջավայր են ստեղծում հեղինակավոր այնպիսի վարպետների քանդակների համար, ինչպիսիք են Ֆերնանդո Բոդերոն, Լին Չեդուիկը, Ժոմ Պլենզանը և Բարի Ֆլանագանը։
Կենտրոնում ցուցադրվում են Գաֆեսջյանի անձնական հավաքածուին պատկանող ցուցանմուշներ։ Դրանց թվում են Դեյլ Չիխուլիի՝ ապակուց արված ավանգարդ «Պարսկական» ինստալյացիան, ինչպես նաև Յարոմիր Ռիբակի (Չեխիա), Տադաշի Սումիի (Ճապոնիա), Բերտիլ Վալիենի (Շվեդիա) ապակեգործության նմուշներ։ «Արծիվ» սրահում ցուցադրված են ամերիկահայ հայտնի նկարիչ Արշիլ Գորկու աշխատանքների բնօրինակները։
Կենտրոնի ցուցահանդեսային ժամանակացույցը համալրվում է նաև դասախոսությանուններով, ֆիլմերի, համերգների, երեխաների և մեծահասակների համար կրթական ծրագրերի ցուցադրմամբ։ -0-
