ՄԱԿ-ի Միջազգային դատարանի որոշումը Կոսովոյի անկախության ինքնահռչակման իրավացիության վերաբերյալ պետք է որպես ազդանշան ծառայի հայկական դիվանագիտության կողմից Լեռնային Ղարաբաղի անկախության միջազգային ճանաչման պահանջով բանակցային գործընթաց սկսելու համար, կարծում է Հայաստանի Հանրապետական կուսակցության խորհրդարանական խմբակցության ղեկավար Գալուստ Սահակյանը։
ՄԱԿ-ի Միջազգային դատարանը հուլիսի 22-ին խորհրդակցական եզրակացություն է կայացրել, ըստ որի՝ Կոսովոյի անկախության ինքնահռչակումը չի հակասում միջազգային իրավունքի նորմերին: Դատարանը կարծում է, որ միջազգային իրավունքն անկախության հռչակման որևէ տեսանելի արգելք չի պարունակում:
«Տարբեր պետությունների հետ բանակցային գործընթացներում Հայաստանի դիվանագիտական կորպուսները պետք է պահանջեն Լեռնային Ղարաբաղի անկախության ճանաչումը կամ Ղարաբաղի ճանաչումը որպես միջազգային սուբյեկտ»,- չորեքշաբթի լրագրողներին հայտարարեց Սահակյանը։
Միաժամանակ նա կարևորեց Հայաստանի մասնակցությունը տվյալ գործընթացում։ «Այս առումով կարծիք կա, որ եթե մենք գործում ենք ԵԱՀԿ Մինսկի խմբի շրջանակներում, ապա Ղարաբաղը ազատ է ինքնուրույն սկսելու այս գործընթացը, սակայն Հայաստանի արհեստական մեկուսացումը որևէ լավ բանի չի հանգեցնի»,- ընդգծեց ՀՀԿ խմբակցության ղեկավարը։
Բացի այդ Սահակյանը համոզմունք հայտնեց, որ Հաագային դատարանի որոշումն էապես չի ազդի ղարաբաղյան հարցի վերջնական լուծման վրա։ «Հայաստանի համար պարզից էլ պարզ է, որ ՄԴ որոշումն էական ազդեցություն չի կարող ունենալ ղարաբաղյան հարցի վրա»,- ասաց նա։
Միաժամանակ Սահակյանն ընդգծեց իր տեսակի մեջ առաջին նմանատիպ փոստաթղթի նշանակությունը, որն ակտիվացնում է անկախության ճանաչման գործընթացը նմանատիպ խնդիրներ ունեցող տարածաշրջաններում։
Ղարաբաղյան հակամարտությունը սկսվել է 1988 թվականին, երբ գերազանցապես հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին: 1991թ. դեկտեմբերի 10-ին Լեռնային Ղարաբաղում հանրաքվե անցկացվեց, որի ժամանակ մասնակիցների 99,89 տոկոսը քվեարկեց Ադրբեջանից լիովին անկախանալու օգտին:
Դրան հետևեցին Ադրբեջանի ձեռնարկած լայնածավալ ռազմական գործողությունները, որոնք հանգեցրին նրան, որ նրանք կորցրեցին վերահսկողությունը ոչ միայն Լեռնային Ղարաբաղի, այլև հարակից յոթ շրջանների նկատմամբ:
1994թ. մայիսի 12-ին զինադադարի վերաբերյալ եռակողմ համաձայնագրի կնքումից հետո հակամարտության գոտում դադարեցին ռազմական գործողությունները, որոնց արդյունքում երկու կողմից էլ եղավ շուրջ 25-30 հազար զոհ և մոտ մեկ միլիոն մարդ ստիպված լքեց բնօրրանը:
Հրադադարի ռեժիմ հաստատելու վերաբերյալ համաձայնագիրը մինչ այսօր ուժի մեջ է: 1992 թվականից ի վեր հակամարտության խաղաղ կարգավորման ուղղությամբ բանակցություններ են տարվում ԵԱՀԿ Մինսկի խմբի շրջանակներում, որի համանախագահներն են ԱՄՆ-ն, Ռուսաստանը և Ֆրանսիան: -0-
