Կոսովոյի հարցով ՄԱԿ ՄԴ եզրակացությունը կօգնի ղարաբաղյան խնդիրն իրավական դաշտ տեղափոխել

Կոսովոյի հարցով ՄԱԿ-ի Միջազգային դատարանի որոշումը կօգնի ղարաբաղյան հակամարտության կարգավորման խնդիրը քաղաքանից իրավական դաշտ տեղափոխել, այդ կարծիքին է իշխող Հանրապետական կուսակցությունից ՀՀ ազգային ժողովի պատգամավոր Լեռնիկ Ալեքսանյանը:

ՄԱԿ-ի Միջազգային դատարանը հուլիսի 22-ին խորհրդակցական եզրակացություն է կայացրել, ըստ որի՝ Կոսովոյի անկախության ինքնահռչակումը չի հակասում միջազգային իրավունքի նորմերին: Դատարանը կարծում է, որ միջազգային իրավունքն անկախության հռչակման որևէ տեսանելի արգելք չի պարունակում:

«Կոսովոյի հետ կապված որոշումը մեզ լուրջ հիմքեր կտա ղարաբաղյան հակամարտության կարգավորման հարցը քաղաքականից իրավական դաշտ տեղափոխել»,- չորեքշաբթի մամուլի ասուլիսի ժամանակ ասաց Ալեքսանյանը:

Ալեքսանյանը նշեց, որ Կոսովոյի մասին որոշումը կարղ է նաև բազմաթիվ չճանաչված հանրապետությունների անկախության ճանաչման գործընթացի ընդլայնման բերել, մասնավորապես` Աբխազիայի:

Միաժամանակ պատգամավորն ընդգծեց, որ ղարաբաղյան հակամարտության կարգավորումը պետք է լուծվի միայն ԵԱՀԿ Մինսկի խմբի շրջանակներում:

Ղարաբաղյան հակամարտությունը սկսվել է 1988 թվականին, երբ գերազանցապես հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին: 1991թ. դեկտեմբերի 10-ին Լեռնային Ղարաբաղում հանրաքվե անցկացվեց, որի ժամանակ մասնակիցների 99,89 տոկոսը քվեարկեց Ադրբեջանից լիովին անկախանալու օգտին:

Դրան հետևեցին Ադրբեջանի ձեռնարկած լայնածավալ ռազմական գործողությունները, որոնք հանգեցրին նրան, որ նրանք կորցրեցին վերահսկողությունը ոչ միայն Լեռնային Ղարաբաղի, այլև հարակից յոթ շրջանների նկատմամբ:

1994թ. մայիսի 12-ին զինադադարի վերաբերյալ եռակողմ համաձայնագրի կնքումից  հետո հակամարտության գոտում դադարեցին ռազմական գործողությունները, որոնց արդյունքում երկու կողմից էլ եղավ շուրջ 25-30 հազար զոհ և մոտ մեկ միլիոն մարդ  ստիպված լքեց բնօրրանը:

Հրադադարի ռեժիմ հաստատելու վերաբերյալ համաձայնագիրը մինչ այսօր ուժի մեջ է: 1992 թվականից ի վեր հակամարտության խաղաղ կարգավորման ուղղությամբ բանակցություններ են տարվում ԵԱՀԿ Մինսկի խմբի շրջանակներում, որի համանախագահներն են ԱՄՆ-ն, Ռուսաստանը և Ֆրանսիան: -0-