Հայաստանը պատրաստ է իրականացնել երկրում մարդու իրավունքների պաշտպանության խստացման ՄԱԿ-ի անդամ երկրների բոլոր առաջարկությունները, որոնք առաջարկվել են մարդու իրավունքների մասին առաջին ազգային պարբերական զեկույցի շրջանակներում, ասաց ՀՀ արտգործնախարարի տեղակալ Արման Կիրակոսյանը:
«Մայիսի 6-ին ՄԱԿ-ի Մարդու իրավունքների խորհրդի նիստի ժամանակ հաստատվել է մարդու իրավունքների պաշտպանության ոլորտում իրավիճակի վերաբերյալ Հայաստանի առաջին ընդհանուր պարբերական զեկույցը: Զեկույցի քննարկման շրջանակներում մի շարք առաջարկություններ են ներկայացվել, որոնք Հայաստանը պատրաստ է իրականացնել»,-երեքշաբթի ՄԱԿ-ի առաջարկությունների կատարմանը նվիրված ՄԱԿ-ի երևանյան գրասենյակի կողմից կազմակերպված սեմինարի ժամանակ նշեց Կիրակոսյանը:
Ինչպես հայտնեց Կիրակոսյանը, ՄԱԿ-ի կանոնակարգի համաձայն՝ 2006թ.-ից չորս տարին մեկ անգամ բոլոր երկրներն իրենց կողմից ներկայացրած պարբերական զեկույցների վերանայում են անցնում: Այս տարվա մայիսին ներկայացված ՀՀ առաջին պարբերական զեկույցը, ինչպես նշեց փոխնախարարը, մարդու իրավունքների պաշտպանության ոլորտում հարցերի լայն շրջանակ է ներառել և պատրաստվել է բոլոր իրավասու մարմինների և գերատեսչությունների մասնակցությամբ:
Նա տեղեկացրեց, որ զեկույցի պաշտպանությունը երեք ժամ է տևել և զեկույցի վերաբերյալ իրենց առաջարկությունները ներկայացրել է ՄԱԿ-ի 47 անդամ երկիր, որոնք մասնակցում էին քննարկումներին: Ինչպես ավելացրեց փոխնախարարը, հիմնականում երկրները դրական գնահատականների են զեկույցն արժանացրել և ներկայացրել են իրենց առաջարկությունները, որոնք իրականացումը չորս տարի անց հերթական զեկույցի ներկայացման ժամանակ թույլ կտա ավելի բարձր գնահատականների արժանացնել:
Հայաստանում ՄԱԿ մշտական համակարգող, ՄԱԿԶԾ մշտական ներկայացուցիչ Դաֆինա Գերչևան ասաց, որ ՄԱԿ երևանյան գրասենյակն արդեն երկրի կառավարությանն աջակցություն է ցուցաբերում միջազգային փաստաթղթերում ամրագրված պարտավորությունների իրականացման գործում:
«Ներկայացված պարբերական զեկույցի առաջարկություններից շատերն արդեն իրականացվում են 2010-2015թթ. զարգացման աջակցության հարցով ՄԱԿ ծրագրի շրջանակներում, դա վկայում է այն մասին, որ բացահայտված խնդիրների մեծ մասը գտնվում է մշտական ուշադրության կենտրոնում և օգտվում է ՄԱԿ-ի աջակցությունից»,- ասաց Գերչևան:
Հայաստանի պարբերական ազգային զեկույցում, մասնավորապես, ներկայացված են 1991թ.-ից հանրապետության անկախության հռչակման ժամանակից ի վեր մարդու իրավունքների պաշտպանության համակարգի զարգացման վերաբերյալ քայլերը, միջազգային համագործակցության ընդլայնման ոլորտում վերջին զարգացումները, օրենսդրության բարեփոխման աշխատանքները, թրաֆիքինգի, ռասիզմի, ազգայնականության դեմ պայքարը: Զեկույցում նաև ներկայացված է երեխաների իրավունքների պաշտպանության և ազգային փոքրամասնությունների հետ կապված իրավիճակը, Ադրբեջանի ավելի քան 400 հազար հայ փախստականների խնդրի լուծումը: -0-
