Հայաստանը որոշ պատճառներով դեռ չի կարող ճանաչել ԼՂՀ անկախությունը, կարծում է «Եվրոպական ինտեգրացիա» հասարակական կազմակերպության ղեկավար, քաղաքական վերլուծաբան Կարեն Բեքարյանը:
«Կարծում եմ, որ դեռ ժամանակը չէ ԼՂՀ-ն ճանաչելու համար, սակայն առիթ կա բարեկամ երկրների պատգամավորների հետ ԼՂՀ ճանաչման վերաբերյալ խորհրդարանական խորհրդակցություններ սկսելու համար», - երեքշաբթի մամուլի ասուլիսի ժամանակ ասաց Բեքարյանը:
Քաղաքագետը հիշեցրեց, որ ավելի վաղ ՀՀ փոխարտգործնախարար Շավարշ Քոչարյանը նշել է, որ ԼՂՀ անկախության ճանաչման հարցը երբեք չի հանվել Հայաստանի օրակարգից, սա միայն ժամանակի հարց է:
Փորձագետը նշեց, որ հաճախ խոսելով ԼՂՀ ճանաչման գործընթացի մասին` նկատի ունեն հենց Հայաստանի կողմից հանրապետության անկախության ճանաչումը: Սակայն, ինչպես հիշեցրեց փորձագետը, ոչինչ չի խանգարում ԼՂՀ արտգործնախարարությանը անկախության ճանաչման հարցով դիմել բարեկամ երկրներին, այդ թվում նաև Հայաստանին:
Ինչպես կարծում է Բեքարյանը, ԼՂՀ միջազգային ճանաչման հարցը միայն Հայաստանի կողմից ճանաչման հետ կապելը նշանակում է զգալիորեն «նեղացնել խնդրի անկյունը»:
«ԼՂՀ ճանաչման նպատակահարմարության մասին հարցի պատասխանն ունի միայն բանակցող կողմը (Հայաստանը), որն ավելի լավ գիտի բանակցությունների ընթացքը... ԼՂՀ-ն, չլինելով բանակցող կողմ և կաշկանդված չլինելով որոշակի հանգամանքներով, ազատ է իր գործողություններում: Դա չի նշանակում, որ ԼՂՀ-ն պետք է աշխատի միայն Հայաստանի հետ, Ղարաբաղը պետք է աշխատի շատ երկրների, այդ թվում նաև Հայաստանի հետ», - հայտարարեց նա:
Ղարաբաղյան հակամարտությունը սկսվել է 1988 թվականին, երբ գերազանցապես հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին: 1991թ. դեկտեմբերի 10-ին Լեռնային Ղարաբաղում հանրաքվե անցկացվեց, որի ժամանակ մասնակիցների 99,89 տոկոսը քվեարկեց Ադրբեջանից լիովին անկախանալու օգտին:
Դրան հետևեցին Ադրբեջանի ձեռնարկած լայնածավալ ռազմական գործողությունները, որոնք հանգեցրին նրան, որ նրանք կորցրեցին վերահսկողությունը ոչ միայն Լեռնային Ղարաբաղի, այլև հարակից յոթ շրջանների նկատմամբ:
1994թ. մայիսի 12-ին զինադադարի վերաբերյալ եռակողմ համաձայնագրի կնքումից հետո հակամարտության գոտում դադարեցին ռազմական գործողությունները, որոնց արդյունքում երկու կողմից էլ եղավ շուրջ 25-30 հազար զոհ և մոտ մեկ միլիոն մարդ ստիպված լքեց բնօրրանը:
Հրադադարի ռեժիմ հաստատելու վերաբերյալ համաձայնագիրը մինչ այսօր ուժի մեջ է: 1992 թվականից ի վեր հակամարտության խաղաղ կարգավորման ուղղությամբ բանակցություններ են տարվում ԵԱՀԿ Մինսկի խմբի շրջանակներում, որի համանախագահներն են ԱՄՆ-ն, Ռուսաստանը և Ֆրանսիան: -0-
