Այժմ Թուրքիան պետք է քաղաքական կամք ցուցաբերի հայ-թուրքական գործընթացում. Սարգսյան

ԵՐԵՎԱՆ, 22 հուլիսի./Նովոստի-Արմենիա/. ՀՀ նախագահ Սերժ Սարգսյանը կարծում է, որ Թուրքիայի հերթն է հայ-թուրքական գործընթացքում քաղաքական կամք ցուցաբերելու։

«Ամբողջ աշխարհը Թուրքիային է ասում, որ կամք ցուցաբերի և վավերացնի ստորագրված արձանագրությունները, թուրքերը կարծես դա չեն լսում և մեզ են ասում կամք ցուցաբերել»,- նախօրեին Սևանում ասաց պետության ղեկավարը՝ պատասխանելով «Միասին» երիտասարդական շարժման քննարկման մասնակիցների հարցերին։

Ըստ նրա՝ հայկական կողմն իր հասանելիք կամքն արդեն ցուցաբերել է։ «Մենք երբեք բարեկամաբար մեկնած ձեռքը չենք անտեսում, բայց երբ այդ մեկնած ձեռքը իրականության մեջ չկա, այլ ներկայացնում են որպես այդպիսին, մենք դրա վրա ուշադրություն չենք դարձնում»,- ասաց նախագահը ՝ մեկնաբանելով թուրքական կողմի այն հայտարարությունները, որ Հայաստանը գուցե բոլորից շատ տուժի՝ մերժելով այն ձեռքը, որն իրեն Թուրքիան է բարեկամորեն ուղղում։

Հայաստանի և Թուրքիայի՝ մինչև վերջին ժամանակները բավականին լարված հարաբերությունները սկսեցին կարգավորվել, երբ երկու երկրի արտգործնախարարներ Էդվարդ Նալբանդյանն ու Ահմեդ Դավութօղլուն հոկտեմբերի 10-ին Ցյուրիխի համալսարանում ստորագրեցին «Դիվանագիտական հարաբերությունների հաստատման մասին արձանագրությունը» և «Երկկողմ հարաբերությունների զարգացման մասին արձանագրությունը»:

Սակայն ՀՀ նախագահ Սերժ Սարգսյանն ապրիլի 22-ի իր հրամանագրով կասեցրել է երկրի խորհրդարանում հայ-թուրքական արձանագրությունների վավերացման ընթացակարգը՝ հայտարարելով, որ Թուրքիան պատրաստ չէ շարունակել սկսված գործընթացը: