ՀՀ կառավարությունը որպես հումանիտար օգնություն ավելի քան $100 հազար է հատկացրել Ղրղզստանին

ԵՐԵՎԱՆ, 22 հուլիսի./Նովոստի-Արմենիա/. ՀՀ կառավարությունը հինգշաբթի կայացած նիստի ժամանակ որպես հումանիտար օգնություն 40 մլն դրամ է (շուրջ 109 հազար դոլար) հատկացրել Ղրղզստանին։

Ինչպես հայտնեց ՀՀ ֆինանսների նախարար Տիգրան Դավթյանը, Ղրղզստանն ավելի վաղ դիմել է ԱՊՀ երկրներին՝ իրենց հնարավորությունների շրջանակներում հումանիտար, ֆինանսական և տեխնիկական օգնություն ցուցաբերելու խնդրանքով։

«Մենք որոշում ենք կայացրել որպես հումանիտար օգնություն  Ղրղզստանին 40 մլն դրամ հատկացնել»,-տեղեկացրեց նախարարը։

ՀՀ վարչապետ Տիգրան Սարգսյանը հիշեցրեց, որ Ղրղզստանի հումանիտար օգնությունն արդեն թվով երրորդը կլինի, որ հատկացրել է ՀՀ կառավարությունը արտասահմանյան պետություններին։

«Մենք արդեն օգնություն ենք ցուցաբերել Հաիթիին և Տաջիկստանին։ Մենք՝ մեր ֆինանսական հնարավորությունների շրջանակներում, օգնում ենք մեր գործընկերներին»,- հայտնեց վարչապետը։

ՀՀ կառավարությունն ավելի վաղ արդեն 100 հազարական դոլար էր հատկացրել ավերիչ երկրաշարժերից տուժած Հաիթիին և Տաջիկստանին։ -0-