ԵՐԵՎԱՆ, 21 հուլիսի./Նովոստի-Արմենիա/. ՀՀ վարչապետ Տիգրան Սարգսյանն իր ցավակցություններն է ուղղել Դեղերի և բժշկական տեխնոլոգիաների փորձաքննության գիտական կենտրոնի տնօրեն, ականավոր գիտնական, ակադեմիկոս Էմիլ Գաբրիելյանի մահվան կապակցությամբ, չորեքշբաթի «Նովոստի-Արմենիա» գործակալությանը հաղորդեցին կառավարության մամուլի ծառայությունից։
Էնիլ Գաբրիելյանը բժշկական գիտությունների պրոֆեսոր է, տարբեր տարիների զբաղեցրել է Հայկական ԽՍՀ առողջապահության նախարարի, Երևանի բժշկական համալսարանի ռեկտորի, ԱՀԿ Առողջության հետազոտման եվրոպական կոնսուլտատիվ հանձնաժողովի անդամի պաշտոնը, ինչպես նաև «Արմենիկում» (ՁՒԱՀ-ի բուժման միջոց) նախագծի ղեկավարն է։
«Խոր վշտով տեղեկացա ակադեմիկոս Էմիլ Գաբրիելյանի մահվան մասին:
Կյանքից հեռացավ հայկական բժշկական գիտության երախտավորը, մանկավարժը, հասարակական գործիչն ու առողջապահության կազմակերպիչը»,- ասվում է վարչապետի հեռագրի մեջ։
Ցավակցությունում նշվում է, որ Գաբրիելյանն այն եզակիներից էր, ով օժտված էր ոչ միայն վառ ու բազմակողմանի տաղանդով, այլև մարդկային կարևոր առաքինություններով:
«Նրա անուրանալի վաստակն ու մեծ ներդրումը գնահատված են թե՛ պետության, թե՛ մասնագիտական հանրության կողմից: Մեծ մարդն ու գիտնականը վայելում էր ոչ միայն իր գործընկերների, այլև շատերի հարգանքն ու համակրանքը:
Հայաստանի Հանրապետության կառավարության և իմ անունից ցավակցում եմ Էմիլ Գաբրիելյանի ընտանիքի անդամներին, հարազատներին, գործընկերներին և սաներին»,- ասաց Սարգսյանը։
Էմիլ Գաբրիելյանը ծնվել է 1931թ.-ի հունվարի 31-ին Աշտարակ քաղաքում, կրթությունը ստացել է Հայաստանում, որից հետո պրակտիկա է ստացել Ռուսաստանի, Մեծ Բրիտանիայի և Շվեյցարիայի բուհերում։ Ավելի քան 350 գիտական աշխատանքների հեղինակ է, այդ թվում՝ գրքերի և ձեռնարկների։
1999թ.-ի Կալինգայի (ՅՈՒՆԵՍԿՕ) միջազգային մրցանակի դափնեկիր է։ Պարգևատրվել է Աշխատանքային Կարմիր Դրոշի, Ժողովուրդների Բարեկամության, «Merit for life», «Ասպետական Խաչ», Վերնադսկու «Ոսկե աստղ» շքանշաններով, Պիրոգովի, Ն. Պ. Կրավկովի և Մխիթար Հերացու մեդալներով, Բնական գիտությունների եվրոպական ակադեմիայի Պ. Էրլիխի մեդալով։ -0-
