Գերմանիայի Դաշնային Հանրապետության Դաշնային պաշտպանության նախարար Կարլ-Թեոդոր զու Գուտենբերգի հրավերով ՀՀ պաշտպանության նախարար Սեյրան Օհանյանը երկօրյա պաշտոնական այցով մեկնել է Գերմանիայի Դաշնային Հանրապետություն, հաղորդում է ՀՀ պաշտպանության նախարարության մամուլի ծառայությունը:
«Այցի ընթացքում ՀՀ պաշտպանության նախարարը հանդիպումներ կունենա Գերմանիայի Դաշնային պաշտպանության նախարարի և ռազմաքաղաքական ղեկավարության հետ», - նշվում է տեղեկատվության մեջ:
ՀՀ ՊՆ պատվիրակությունը կայցելի Գերմերշեյմի վարժական կենտրոն, որտեղ Աֆղանստանում միջազգային անվտանգության աջակցման ուժերի (ISAF) կազմում ընդգրկվելիք ՀՀ ԶՈՒ խաղաղապահ զորախմբի երկրորդ հերթափոխը խաղաղապահ առաքելության մեկնելուց առաջ անցնում է նախատեղակայման վարժանք:
Աֆղանստանում հայկական զինվորական համակազմը Կունդուզ գավառում իրականացնում է իր գործունեությունը 2010 թ.-ի փետրվարից գերմանական ղեկավարության ներքո ISAF-ի հյուսիսային տարածաշրջնային հրամանատարության կազմում: Համակազմում ներառված են հետևակային դասակը, բժիշկ-սպա և երեք շտաբային սպաներ:
Այցի շրջանակներում նախատեսված է նաև Սեյրան Օհանյանի հանդիպումը Գերմանիայի հայ համայնքի ներկայացուցիչների հետ:-0-
