Օպերատիվ վիճակագրական տվյալների համաձայն՝ Հայաստանի ՀՆԱ-ն հունվար-հունիս ամիսներին՝ 2009թ.-ի միևնույն ժամանակահատվածի համեմատ, ավելացել է 6,7 տոկոսով, «Նովոստի-Արմենիա» գործակալությանը հաղորդեցին ՀՀ Ազգային վիճակագրական ծառայությունից։
ՀՆԱ ծավալը կազմել է 1332 մլրդ դրամ (3,7 մլրդ դոլար)։
Վիճակագրական տվյալների համաձայն՝ հունվար-հունիս ամիսներին, 2009թ. միևնույն ժամանակահատվածի համեմատ, գրանցվել է սպառողական գնաճ 7,3 տոկոսով: Միաժամանակ հունվար-հունիս ամիսներին՝ 2009թ.-ի դեկտեմբերի համեմատ, գրանցվել է տվյալ ցուցանիշի աճ 4,5 տոկոսով։
Հայաստանում արդյունաբերական ապրանքների արտադրողների գները հաշվետու ժամանակաշրջանում ավելացել են 32,6 տոկոսով՝ նախորդ տարվա նույն ժամանակաշրջանի համեմատ։
Հաշվետու ժամանակահատվածում 370,8 միլիարդ դրամի (1021,6 միլիոն դոլար) արդյունաբերական արտադրանք է արտադրվել, ինչը 12,3 տոկոսով բարձր է նախորդ տարվա նույն ժամանակաշրջանի ցուցանիշից:
Հայաստանի արտաքին առևտրաշրջանառության ծավալը կազմել է 2166 մլն ԱՄՆ դոլար (832,6 մլրդ դրամ)՝ 2009թ.-ի միևնույն ժամանակաշրջանի համեմատ ավելանալով 29,8 տոկոսով:
Պետբյուջեի համաձայն՝ 2009թ. ՀՆԱ աճը Հայաստանում նախատեսված է 1,2 տոկոսի չափով։ -0-
