Հայկական խորհրդարանի խոսնակը պաշտոնական այցով կմեկնի Կիպրոս

ԵՐԵՎԱՆ, 20 հուլիսի./Նովոստի-Արմենիա/.  Կիպրոսի Ներկայացուցիչների պալատի նախագահ Մարիոս Գարոյանի հրավերով ՀՀ Ազգային ժողովի խոսնակ Հովիկ Աբրահամյանը պաշտոնական այցով կմեկնի Կիպրոս, երեքշաբթի «Նովոստի-Արմենիա» գործակալությանը հաղորդեցին երկրի խորհրդարանի մամուլի ծառայությունից։

Հանդիպման ժամանակ, որը  տեղի ունեցավ նախօրեին՝ Ժնևում երրորդ համաշխարհային վեհաժողովի շրջանակներում, Աբրահամյանը նշեց, որ  Հայաստանի և Կիպրոսի միջև հաստատված ավանդական բարեկամական հարաբերությունները կարևոր գրավական են փոխհարաբերությունների հետագա զարգացման և առավել խորացման համար:

Նա ողջունեց ակտիվ միջխորհրդարանական համագործակցությունը` նշելով, որ երկու երկրների խորհրդարաններում գործող Հայաստան-Կիպրոս և Կիպրոս-Հայաստան պատգամավորական միջխորհրդարանական հանձնաժողովները կարևոր ներդրում կարող են ունենալ Հայաստանի և Կիպրոսի միջև քաղաքական, տնտեսական, մշակութային, կրթական և գիտական բնագավառներում համագործակցության ընդլայնման և միջխորհրդարանական կապերի ամրապնդման գործում:

Տնտեսական կապերը առավել զարգացնելու նպատակով Աբրահամյանն առաջարկեց կազմակերպել բիզնես ֆորումներ: Կիպրոսի Ներկայացուցիչների պալատի նախագահ Մարիոս Գարոյանը նույնպես կարևորեց միջխորհրդարանական կապերի խորացումը և վերահաստատեց  Հովիկ Աբրահամյանին Կիպրոս պաշտոնական այց կատարելու իր հրավերը: Նա ողջունեց ԱԺ նախագահի՝ բիզնես ֆորում կազմակերպելու առաջարկը:

Հանդիպման ընթացքում կողմերը քննարկեցին միջազգային կառույցներում փոխգործակցությանը, ղարաբաղյան հակամարտության կարգավորմանը և երկկողմ հետաքրքրություն ներկայացնող այլ հարցեր ևս:

Գարոյանը ընդգծեց, որ Կիպրոսը Հայաստանի կողքին է և միջազգային կազմակերպություններում Հայաստանը միշտ  կարող է ակնկալել Կիպրոսի աջակցությունը: -0-