ՀՀ ԱԺ խոսնակ Հովիկ Աբրահամյանը նախօրեին Ժնևում ԱՄԷ Ազգային դաշնային խորհրդի նախագահ Աբդուլ Ազիզ Ալ Ղուրեյրի հետ հանդիպման ժամանակ առաջարկել է ակտիվացնել երկկողմ միջխորհրդարանական կապերը, հաղորդում է ՀՀ ԱԺ մամուլի ծառայությունը:
Աբրահամյանի խոսքերով՝ Հայաստանի և ԱՄԷ-ի միջև խորհրդարանական համագործակցությունը զիջում է առևտրատնտեսական հարաբերությունների մակարդակին:
Մասնավորապես, ՀՀ ԱԺ նախագահն առաջարկել է ակտիվացնել միջխորհրդարանական պատվիրակությունների փոխայցելությունները:
«Հայաստանը մեծ նշանակություն է տալիս Պարսից ծոցի արաբական երկրների հետ հարաբերությունների հետագա զարգացմանը, ուշադրությամբ հետևում է տարածաշրջանի քաղաքական գործընթացներին և տնտեսական նվաճումներին», - ասել է ՀՀ ԱԺ խոսնակը:
Նա բարձր է գնահատել ԱՄԷ հավասարակշիռ արտաքին քաղաքականությունը տարածաշրջանային և միջազգային մակարդակներում: Աբրահամյանը գոհունակությամբ փաստել է, որ Հայաստանի և Արաբական Միացյալ Էմիրությունների միջև հարաբերությունները կայուն առաջընթաց են ապրում և կարևորեց առևտրատնտեսական համագործակցության ձեռքբերումները:
Աբդուլ Ազիզ Ալ Ղուրեյրն իր հերթին նույնպես անհրաժեշտ է համարել միջխորհրդարանական կապերի ակտիվացումը և զարգացումը` նշելով, որ իր երկիրը մեծ նշանակություն է տալիս Հայաստանի հետ փոխգործակցությանը տարբեր ուղղություններով: Նա բարձր է գնահատել Հայաստանի ջանքերը տարածաշրջանում խաղաղություն և կայունություն ապահովելու և հարևանների հետ հարաբերությունների կարգավորման հարցում:-0-
