Եվրամիությունն ու Եվրախորհուրդը վերջին հինգ տարվա ընթացքում մոտ 400-500 հազար եվրո են տրամադրել Հարավային Կովկասում միջազգային երիտասարդական համագործակցության ծրագրերի իրկանացմանը, երկուշաբթի մամուլի ասուլիսի ժամանակ ասաց «Հայաստանի երիտասարդական ակումբների դաշնություն» (FYCA) հասարակական կազմակերպության նախագահ Ատոմ Մխիթարյանը։
«Սկզբնական փուլում հայկական կողմը պասիվ էր։ Միջոցների շուրջ 60 տոկոսը տրամադրվում էր Ադրբեջանի նախաձեռնած ծրագրերին։ Այժմ իրավիճակը մի փոքր փոխվել է մեր օգտին։ Սակայն կարևոր է նշել, որ Ադրբեջանը պետական մակարդակով խոչընդոտում է հայկական նախաձեռնությունների իրականացմանը»,- ընդգծեց Մխիթարյանը։
Ըստ FYCA ղեկավարի՝ սեպտեմբերին Հայաստանում տարածաշրջանի միջազգային մշակութային երկխոսության խթանման երկու ծրագիր կիրականացվի։
«Առաջին ծրագիրը, որը կոչվում է «Նոյան տապան», մեկնարկում է սեպտեմբերի սկզբին Երևանում, կտևի 12 օր Հայաստանի տարբեր քաղաքներում, Վրաստանում և Թուրքիայում, և կավարտվի Երևանում»,- նշեց Մխիթարյանը։
Նա հայտնեց, որ ծրագրի արժեքը շուրջ 28 հազար եվրո է, որը կտրամադրվի ԵՄ և ԵԽ կողմից։
«Մեկ այլ՝ 14 հազար եվրո արժողությամբ ծրագիր կիրականացվի Ծաղկաձորում՝ «Նոյան տապան» ծրագրից հետո։ Մեկ շաբաթվա ընթացքում Եվրախորհրդի անդամ երկրների շուրջ 35 երիտասարդ ներկայացուցիչներ կքննարկեն տարածաշրջանային հակամարտությունների լուծման ճանապարհը»,- նշեց կազմակերպության նախագահը։
Նա ավելացրեց, որ նման ծրագրերը կնպաստեն որոշում կայացնելու գործընթացում երիտասարդության դերի բարձրացմանը։ -0-
