ԵԱՀԿ ՄԽ համախագահ երկրները ղարաբաղյան հակամարտության կողմերին կոչ են անում հավատարիմ մնալ հելսինկյան եզրափակիչ ակտի սկզբունքներին՝ ուժի չկիրառման կամ ուժի սպառնալիքի, տարածքային ամբողջականության և ազգերի ինքնորոշման իրավունքի սկզբունքներին, ասվում է ԵԱՀԿ պաշտոնական կայքում:
Ռուսաստանի, Ֆրանսիայի և ԱՄՆ-ի արտաքին քաղաքական գերատեսչությունների ղեկավարներ Սերգեյ Լավրովը, Բերնար Քուշները և պետքարտուղարի տեղակալ Ջեյմս Սթեյնբերգը շաբաթ օրը Ղազախստանում Հայաստանի և Ադրբեջանի արտգործնախարարներ Էդվարդ Նալբանդյանի և Էլմար Մահմեդյարովի հետ հանդիպումից հետո համատեղ հայտարարությամբ են հանդես եկել։
Նրանք նշել են, որ այդ սկզբունքներն իրենցից մի ամբողջականություն են ներկայացնում, և մյուսների նկատմամբ սկզբունքներից որևէ մեկին նախապատվության ցանկացած փորձ անընդունելի է և անհավասարակշիռ որոշման կհանգեցնի։
Ղարաբաղյան հակամարտությունը սկսվել է 1988 թվականին, երբ գերազանցապես հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին: 1991թ. դեկտեմբերի 10-ին Լեռնային Ղարաբաղում հանրաքվե անցկացվեց, որի ժամանակ մասնակիցների 99,89 տոկոսը քվեարկեց Ադրբեջանից լիովին անկախանալու օգտին:
Դրան հետևեցին Ադրբեջանի ձեռնարկած լայնածավալ ռազմական գործողությունները, որոնք հանգեցրին նրան, որ նրանք կորցրեցին վերահսկողությունը ոչ միայն Լեռնային Ղարաբաղի, այլև հարակից յոթ շրջանների նկատմամբ:
1994թ. մայիսի 12-ին զինադադարի վերաբերյալ եռակողմ համաձայնագրի կնքումից հետո հակամարտության գոտում դադարեցին ռազմական գործողությունները, որոնց արդյունքում երկու կողմից էլ եղավ շուրջ 25-30 հազար զոհ և մոտ մեկ միլիոն մարդ ստիպված լքեց բնօրրանը:
Հրադադարի ռեժիմ հաստատելու վերաբերյալ համաձայնագիրը մինչ այսօր ուժի մեջ է: 1992 թվականից ի վեր հակամարտության խաղաղ կարգավորման ուղղությամբ բանակցություններ են տարվում ԵԱՀԿ Մինսկի խմբի շրջանակներում, որի համանախագահներն են ԱՄՆ-ն, Ռուսաստանը և Ֆրանսիան: -0-
