Հայաստանը պետք է պատրաստ լինի երկխոսություն վերսկսել Թուրքիայի հետ բոլոր հարցերի շուրջ, բացի Ցեղասպանության փաստից, կարծում է Արմենական-Ռամկավար ազատական կուսակցության նախագահ Հակոբ Ավետիքյանը:
Հայ-թուրքական հարաբերությունների կարգավորման գործընթացը սկսվել էր ՀՀ նախագահ Սերժ Սարգսյանի նախաձեռնությամբ 2008թ.-ի աշնանը: Էդվարդ Նալբանդյանն ու Ահմեդ Դավութօղլուն հոկտեմբերի 10-ին Ցյուրիխի համալսարանում ստորագրեցին «Դիվանագիտական հարաբերությունների հաստատման մասին արձանագրությունը» և «Երկկողմ հարաբերությունների զարգացման մասին արձանագրությունը»: Փաստաթղթերը ստորագրումից հետո պետք է հավանության արժանանային երկու երկրների խորհրդարանների կողմից: Սակայն ՀՀ նախագահ Սերժ Սարգսյանն ապրիլի 22-ի իր հրամանագրով կասեցրել է երկրի խորհրդարանում հայ-թուրքական արձանագրությունների վավերացման ընթացակարգը՝ հայտարարելով, որ Թուրքիան պատրաստ չէ շարունակել սկսված գործընթացը:
«Մենք պետք է պատրաստ լինենք բանակցել Թուրքիայի հետ բոլոր հարցերի շուրջ, բացառությամբ Հայոց ցեղասպանության փաստի: Այս հարցում մենք Թուրքիայի հետ կարող ենք քննարկել միայն Ցեղասպանության հետևանքների վերացումն ու փոխհատուցումների վճարումը», - շաբաթ օրը կուսակցության երկրորդ համագումարի ժամանակ լրագրողներին ասաց Ավետիքյանը:
Նա հիշեցրեց, որ կուսակցությունն արդեն բազմաթիվ անգամ հանդես է եկել հայ-թուրքական գործընթացի մասին հայտարարություններով: Նրա խոսքերով՝ կուսակցությունն անհրաժեշտ է համարում Թուրքիայի հետ քննարկել վիճահարույց խնդիրները, բանակցություններ վարել՝ սահմանները բացելու և դիվանագիտական հարաբերություններ հաստատելու նպատակով:
«Մենք կարծում ենք, որ նախագահի նախաձեռնած հարաբերությունների կարգավորումը հաջող փորձ է համաշխարհային տերությունների կողմից Հայաաստանի մասին դրական կարծիքն ու նրա նկատմամբ վերաբերմունքը բարձրացնելու համար: Ցավոք, Թուրքիան խոչընդոտեց այդ նախաձեռնությանը», - նշել է կուսակցության առաջնորդը:
Միաժամանակ Ավետիքյանն ընդգծեց, որ կուսակցությունը կոչ է անում նախագահ Սարգսյանին Թուրքիայի պատրաստակամության և կառուցողական դիրքորոշման դեպքում վերսկսել բանակցությունները: Սակայն, ինչպես նշեց կուսակցության առաջնորդը, չարժե որևէ փաստաթուղթ ստորագրել, այլ պետք է ավելի կոնկրետ գործել՝ հաստատել դիվանագիտական հարաբերություններ և բացել սահմանները:-0-
