Հայաստան-ՆԱՏՕ հարաբերություններում դրական առաջընթաց է գրանցվել: Սա ամրագրվել է Հայաստան-ՆԱՏՕ անհատական գործընկերության գործողությունների ծրագրի կատարման վերաբերյալ ՆԱՏՕ-ի` մայիսին հրապարակված զեկույցում, «Նովոստի-Արմենիա» գործակալությանը հաղորդեցին ՀՀ Անվտանգության խորհրդի մամուլի ծառայությունից։
Ուրբաթ համանուն միջգերատեսչական հանձնաժողովի 5-րդ նիստում զեկույցի քննարկման ժամանակ, Ազգային անվտանգության խորհրդի քարտուղար Արթուր Բաղդասարյանը գոհունակությամբ արձանագրել է, որ փաստաթղթում մատնանշվում է բազմաթիվ ուղղություններով բարեփոխումների իրականացումը Հայաստանում։
«Կարևոր են հատկապես` պաշտպանական ռազմավարական վերանայման գործընթացում իրականացված բարեփոխումներին ՆԱՏՕ-ի տված գնահատականները, որոնք վկայում են, որ մեր զինված ուժերը գտնվում են միջազգային չափանիշներին համապատասխան բարեփոխումների փուլում: Դա չափազանց կարեւոր է մեր երկրի համար, քանի որ բարձրացնում է մեր զինված ուժերի մարտունակությունը, մեր երկրի անվտանգության մակարդակը»,- ասաց նա։
Բաղդասարյանը հատկապես մատնանշել է զեկույցի այն շեշտադրումները, որտեղ նշվում է, որ Հայաստանը առաջընթաց է գրանցել կոռուպցիայի դեմ պայքարում, որի արդյունքում մեծացել է պետական պաշտոնյաների կոռուպցիոն գործունեությանն առնչվող դատական հետապնդումների քանակը, բարելավումներ են նկատվում պետական կառավարման ոլորտում հակակոռուպցիոն գործունեությանն առնչվող խնդիրներում, բարեփոխումներ կան մարդու իրավունքների պաշտպանության, դատաիրավական համակարգերում:
Ոստիկանության ոլորտում բարեփոխումների ծրագրի մշակման հաջողությունը նշելով, Բաղդասարյանը հասարակական կարգի ամրապնդման ուղղության մեջ լավ արդյունքներ ունենալու վստահություն հայտնեց։
Արթուր Բաղդասարյանի խոսքով` զեկույցում մատնանշվել են նաեւ խնդիրներ, որոնք պետք է վերացնել կարճ ժամանակահատվածում:
Նիստում քննարկվել են նաեւ 2010 թվականի սեպտեմբերին Հայաստանում անցկացվելիք <<Հայաստան-2010>> աղետների արձագանքման զորավարժության նախապատրաստման հետ կապված հարցեր: -0-
