Ադրբեջանաղարաբաղյան սահմանում տեղի ունեցած միջադեպը կարող էր պատահականություն լինել. Կասպրշիկ

ԵՐԵՎԱՆ, 16 հուլիսի./Նովոստի-Արմենիա/. ԵԱՀԿ գործող նախագահի անձնական ներկայացուցիչ Անջեյ Կասպրշիկը «Նովոստի-Արմենիա» գործակալությանը տված հարցազրույցում չի բացառում այն հնարավորությունը, որ ադրբեջանաղարաբաղյան սահմանում տեղի ունեցած միջադեպը կարող էր պատահականություն լինել։

Հունիսի 18-ին ժամը 23-ն անց 30-ի սահմաններում Ադրբեջանի ԶՈՒ հատուկ նշանակության ջոկատայինները հատել են ղարաբաղաադրբեջանական զորքերի շփման գոտու հյուսիսարևելյան հատվածը։ Պաշտպանական թեժ մարտերի ընթացքում ղարաբաղյան կողմից զոհվել է չորս հոգի, ևս չորսը՝ վիրավորվել են։ Ադրբեջանական  ջոկատայինները կրելով կորուստներ դիմել են փախուստի:

«Չեմ ուզում ինչ-որ մեծ քաղաքական եզրակացություններ անել, քանի որ դա կարող է նաև պատահականություն լինել, հուսով եմ, որ այդպես էլ եղել է»,- «Նովոստի-Արմենիա» գործակալությանը տված հարցազրույցում ասաց Կասպրշիկը։

Նա նաև նշեց, որ «եթե այդ հակամարտությանը (ղարաբաղյան. «Նովոստի-Արմենիա») լուծում չտրվի, ապա այդ երևույթները կարող են կրկնվել»։

Ըստ Կասպրշիկի, պատերազմական հայտարարությունները երբեք հակամարտությունը չեն լուծում, «այն լուծվում է հիմնականում խաղաղ բանակցությունների ճանապարհով»։

«Խաղաղ բանակցություններն ընթանում են, ոչ ոք այն չի դադարեցրել։ Այժմ Ալմաթիում ակնկալվում է Հայաստանի և Ադրբեջանի արտգործնախարարների հանդիպումը՝ համանախագահների (ԵԱՀԿ Մինսկի խմբի. «Նովոստի-Արմենիա») մասնակցությամբ»,- ասաց նա։

Ալմաթիում հուլիսի 16-17-ը ԵԱՀԿ երկրների արտգործնախարարների ոչ պաշտոնական հանդիպումների կուլուարներում ծրագրվում է Հայաստանի ու Ադրբեջանի և ղարաբաղյան հակամարտության գծով ԵԱՀԿ Մինսկի խմբի համանախագահ երկրների ներկայացուցիչների հանդիպումը։

Միաժամանակ Կասպրշիկը նշեց, որ պետք է մտածել հետագա քայլերի մասին, և ընդգծեց, որ երբ խոսվում է որոշակի արդյունքների մասին, «բոլորը սպասում են, որ ինչ-որ շրջադարձ է լինելու»։

«Ես շրջադարձ կարող է և չակնկալեի, բայց կարելի է ակնկալել, որ դա կօգնի, նման ամեն մի հանդիպումից ինչ-որ դիրքորոշումներ ավելի պարզ են դառնում, ինչ-որ բան մոտենում է։ Սա շատ դանդաղ գործընթաց է, սա միլիմետրերով շարժում է, բայց եթե դա չլիներ, ոչ մի բանակցություն առաջ չէր ընթանա»,- ասաց նա։

Ղարաբաղյան հակամարտությունը սկսվել է 1988 թվականին, երբ գերազանցապես հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին: 1991թ. դեկտեմբերի 10-ին Լեռնային Ղարաբաղում հանրաքվե անցկացվեց, որի ժամանակ մասնակիցների 99,89 տոկոսը քվեարկեց Ադրբեջանից լիովին անկախանալու օգտին:

Դրան հետևեցին Ադրբեջանի ձեռնարկած լայնածավալ ռազմական գործողությունները, որոնք հանգեցրին նրան, որ նրանք կորցրեցին վերահսկողությունը ոչ միայն Լեռնային Ղարաբաղի, այլև հարակից յոթ շրջանների նկատմամբ:

1994թ. մայիսի 12-ին զինադադարի վերաբերյալ եռակողմ համաձայնագրի կնքումից  հետո հակամարտության գոտում դադարեցին ռազմական գործողությունները, որոնց արդյունքում երկու կողմից էլ եղավ շուրջ 25-30 հազար զոհ և մոտ մեկ միլիոն մարդ  ստիպված լքեց բնօրրանը:

Հրադադարի ռեժիմ հաստատելու վերաբերյալ համաձայնագիրը մինչ այսօր ուժի մեջ է: 1992 թվականից ի վեր հակամարտության խաղաղ կարգավորման ուղղությամբ բանակցություններ են տարվում ԵԱՀԿ Մինսկի խմբի շրջանակներում, որի համանախագահներն են ԱՄՆ-ն, Ռուսաստանը և Ֆրանսիան: -0-