Երևանը պատրաստ է եղբայրական հարաբերություններ հաստատել Բուխարեստի հետ. դեսպան

Երևանը պատրաստ է Բուխարեստի հետ քննարկել եղբայրական կապերի հաստատման հարցը, ասել է Ռումինիայում ՀՀ դեսպան Համլետ Գասպարյանը Բուխարեստի քաղաքապետ Սորին Օպրեսկուի (Sorin Oprescu) հետ հանդիպման ժամանակ, հաղորդում է ՀՀ ԱԳՆ մամուլի ծառայությունը:

Զրուցակիցները մտքեր են փոխանակել Հայաստանի և Ռումինիայի մայրաքաղաքների միջև ուղիղ կապեր հաստատելու և զանազան ծրագրերի շուրջ համագործակցություն ծավալելու հնարավորության մասին:

«ՀՀ դեսպանը Օպրեսկուին է փոխանցել Երևանի քաղաքապետ Գագիկ Բեգլարյանի`  Հայաստանի մայրաքաղաք այցելելու հրավերը` նշելով, որ Երևանը պատրաստ է Բուխարեստի հետ քննարկել եղբայրական կապերի հաստատման հարցը», - նշվում է տեղեկատվության մեջ:

Զրուցակիցները նշել են, որ այս իմաստով նպաստավոր պայմաններ են ստեղծում ինչպես ապակենտրոնացված մակարդակով, այնպես էլ Ֆրանկոֆոն մայրաքաղաքների միջազգային ընկերակցության շրջանակներում համագործակցությունը:

Զրուցակիցները պայմանավորվել են առաջիկայում շարունակել խորհրդակցությունները Հայաստանի հետ կապերի խորացման, ինչպես նաև երկու մայրաքաղաքներում առանձին ծրագրերի մշակման և իրականացման ուղղությամբ:-0-