Հայկական ծիրանը ներկայացվեց «Շանհայ ԷՔՍՊՈ 2010» միջազգային ցուցահանդեսին

ԵՐԵՎԱՆ, 16 հուլիսի. /Նովոստի-Արմենիա/. «Ծիրանի այգի» խորագիրը կրող միջոցառումը տեղի ունեցավ «Շանհայ ԷՔՍՊՈ 2010» միջազգային ցուցահանդեսի Հայաստանի տաղավարում, տեղեկացնում ՀՀ ԱԳՆ լրատվական ծառայությունը:

ՉԺՀ-ում Հայաստանի դեսպանատան կազմակերպած միջցոառման նպատակն էր հայկական ծիրանի և դրանից պատրաստվող պահածոների, հյութերի և խմիչքների ներկայացումը չինական, ինչպես նաև այլ երկրների գործարար շրջանակներին:

Հատուկ այս նպատակով Հայաստանից Շանհայ էր ներմուծվել մեծ քանակությամբ թարմ ծիրան, ինչպես նաև պահածոների լայն տեսականի:

Հայաստանի տաղավար այցելեցին շուրջ 50 չինացի գործարարներ, տարբեր երկրների ազգային կազմկոմիտեների և տաղավարների ներկայացուցիչներ, լրագրողներ:

Հյուրերին ներկայացվեց մանրամասն տեղեկատվություն հայկական ծիրանի, դրանից ստացվող արտադրանքի վերաբերյալ, տրամադրվեցին համապատասխան տպագիր նյութեր և տեսաֆիլմեր: --0--