Հայաստանի Պետեկամուտների կոմիտեն դարձավ IOTA լիիրավ անդամ

ԵՐԵՎԱՆ, 15 հուլիսի. /Նովոստի-Արմենիա/. Հայաստանի Պետական եկամուտների կոմիտեն դարձավ Հարկային մարմինների ներեվրոպական կազմակերպության (Intra-European Organisation of Tax Administrations-IOTA) լիիրավ անդամ, ասվում է կոմիտեի կայքում տեղադրված հաղորդագրությունում:

Հաղորդագրության համաձայն՝ որոշումը կայացվել է կազմակերպության` հուլիսի 9-ին Բրյուսելում անցկացված 14-րդ Ընդհանուր համագումարում:

Պետեկամուտների կոմիտեի նախագահ Գագիկ Խաչատրյանն ընդգծել է, որ հարկային վարչարարության բարեփոխումների գործում ՀՀ ՊԵԿ-ը սերտորեն համագործակցում է Արժույթի միջազգային հիմնադրամի, Համաշխարհային բանկի, ԱՄՆ միջազգային զարգացման գործակալության, Եվրամիության հետ:

IOTA-ի համագումարում որոշվել է կազմակերպության լիիրավ անդամ ճանաչել նաև Ռուսաստանի հարկային ծառայությունը IOTA-ն հարկային վարչարարության հարցերում միջազգային համագործակցության ոլորտում գործող հեղինակավոր կազմակերպություններից է, որն ընդգրկում է եվրոպական տարածաշրջանի 44 պետությունների հարկային մարմիններ, այդ թվում` Արևմտյան և Արևելյան Եվրոպայի պետությունների բացարձակ մեծամասնությունը, ԱՊՀ եվրոպական մասի բոլոր երկրները:

IOTA-ն նպաստում է տարածաշրջանի հարկային մարմինների միջև համագործակցությանը և աջակցում դրանց զարգացմանը, անդամներին ապահովում խորհրդատվությամբ` հարկային վարչարարության հարցերում:--0--