Իրանում շուրջ 20 հայկական եկեղեցիներ կիսաքանդ վիճակում են. փորձագետ

Այսօր Իրանի տարածքում շուրջ 20 հայկական եկեղեցիներ գտնվում են կիսաքանդ վիճակում, հայտնեց Հայկական ճարտարապետությունն ուսումնասիրող հասարակական կազմակերպության (RAA)  ղեկավար Սամվել Կարապետյանը։

«Նման իրավիճակ է ստեղծվել, որովհետև այդ եկեղեցիները կառուցված են աղյուսներից, այդ պատճառով ժամանակի ընթացքում քանդվում են և վերակառուցման ու վերականգնման կարիք զգում»,- հինգշաբթի մամուլի ասուլիսի ժամանակ նշեց Կարապետյանը՝ ներկայացնելով Իրանում հայկական մշակութային ժառանգության հուշարձանների ուսումնասիրման գիտահետազոտական աշխատանքների տվյալները։

Ըստ փորձագետի, նման իրավիճակն առավելապես գերիշխում է պարսիկներով բնակեցված գյուղերում, ովքեր բացարձակապես անտարբեր են ստեղծված իրավիճակում։ «Ամենից հաճախ հենց նրանք, տեսնելով կիսաքանդ եկեղեցիների վիճակը, դրանց տեղերում ցանք են իրականացնում»,- ասաց Կարապետյանը։

Միաժամանակ փորձագետն ավելացրեց, որ նման իրավիճակ է տիրում նաև Իրանի տարածքի մի քանի հայկական գյուղերում, մասնավորապես՝ Ղարղունդ և Բոլորան գյուղերում։

«Ամենից առաջ խնդիրը սեփական մշակութային ժառանգության հանդեպ Իրանի հայկական համայնքի անտարբերության մեջ է»,- ցավով ասաց Կարապետյանը։

Իրանում հայկական մշակութային ժառանգության հուշարձանների ուսումնասիրման լայնածավալ ծրագիրն ընդգրկել է ինչպես պատմական Հայաստանի մաս կազմող տարածքները, այնպես էլ Իրանի հայաբնակ վայրերում տեղադրված պատմական հուշարձանները։ -0-