ՀՀ Կենտրոնական բանկը շրջանառության մեջ է մտցրել արծաթե հուշադրամ՝ նվիրված ջազին

Հայաստանի Հանրապետության կենտրոնական բանկը միջազգային դրամագիտական ծրագրի շրջանակում թողարկել արծաթե հուշադրամ` նվիրված ջազին, «Նովոստի-Արմենիա» գործակալությանը հաղորդեցին ՀՀ ԿԲ մամուլի ծառայությունից։

Մամուլի հաղորդագրության համաձայն, 1000 դրամ անվանական արժեքով մինչև 10000 արծաթե հուշադրամ է թողարկվել։ Հուշադրամը պատրաստված է 925-անոց արծաթե հարգից՝ 38,61 մմ տրամագծով և 28,28 գրամ քաշով։

Շրջանագծի և եզրաշուրթի միջև շրջագծով վերևում հայերեն, իսկ ներքևում անգլերեն ներկայացված են համապատասխանաբար հետևյալ մակագրությունները` «ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ» և «REPUBLIC OF ARMENIA»:

Դաշտի ներքևի աջում երկու տողով հորիզոնական նշված է անվանական արժեքը համապատասխանաբար` «1000» և «ԴՐԱՄ»: Դաշտի կենտրոնի ձախում շրջանագծի մոտ հորիզոնական նշված է թողարկման տարեթիվը` «2010»:

Հուշադրամի դիմերեսի դաշտում պատկերված են ջազային նվագախումբ և ոճավորված երաժշտական գործիքներ, որոնք եզերված են գծավոր շրջանագծով:

Վերևում եզրաշուրթի մոտ շրջագծով լատինատառ մակագրություն է՝ «Maestoso»: Դաշտի ներքևում երկու տողով հորիզոնական անգլերեն և հայերեն մակագրված են համապատասխանաբար` «JAZZ» և «ՋԱԶ»:

Հուշադրամը շրջանագծով երկու կողմից ունի ուռուցիկ եզրաշուրթ:

Հուշադրամի պատրաստման ժամանակ օգտագործվել են գունավոր ներկեր:

Ուրվագծերի հեղինակն է Էդուարդ Կուրղինյանը: Հուշադրամը հատվել է «Մայեր» դրամահատարանում (Գերմանիա):  -0-