Վրաստանի մայրուղային գազատարի հնարավոր վաճառքը չի վնասի Հայաստանին. նախարար
Վրաստանի մայրուղային գազատարի բաժնետոմսերի մի մասի հնարավոր վաճառքը, Հայաստանի համար ինչ-որ ցնցումներ չի ստեղծի, ասաց ՀՀ էներգետիկայի և բնական պաշարների նախարար Արմեն Մովսիսյանը։
Հուլիսի սկզբին Վրաստանի խորհրդարանն առաջին ընթերցմամբ ընդունեց մի օրինագիծ, որով ռազմավարական օբյեկտների ցուցակից բացառեց Ռուսաստանից Հայաստան «երկնագույն» վառելիք մատակարարող գազատարը։
«Այսօրվա դրությամբ, մենք անհանգստանալու ոչ մի առիթ չունենք»,- չորեքշաբթի մամուլի ասուլիսի ժամանակ ասաց Մովսիսյանը։
«Նրանք պարզապես գազամուղի բաժնետոմսերի IPO իրականացնելու ցանկություն են հայտնել»,- ասաց նախարարը՝ ավելացնելով, որ «եթե գազամուղը վաճառքի հանվի, մենք կմտածենք»։
Վրացական էլեկտրոնային ԶԼՄ-ների տվյալներով, Վրաստանի կառավարությունը երեք-չորս տարի հետո ծրագրում է գազատարի 10-15 տոկոս բաժնետոմսերի վաճառքը: Գազատարի պոտենցիալ գնորդների թվում նշվում են ռուսական «Գազպրոմը», ղազախական «Կազմունայգազը» ադրբեջանական նավթագազային պետական ընկերությունը:
Տարանցիկ ճանապարհով Վրաստանով Հայաստան մտնող ռուսական բնական գազի մատակարարման և բաշխման մենաշնորհը ՀՀ ներքին շուկայում պատկանում է «Հայռուսգազարդ» ՓԲԸ-ին:-0-
