ԵՐԵՎԱՆ, 14 հուլիսի./Նովոստի-Արմենիա/. Հայաստանում նոր ատոմային էլեկտրակայանի շինարարության տեխնիկատնտեսական հիմնավորումը գործնականորեն պատրաստ է, ասաց ՀՀ էներգետիկայի և բնական պաշարների նախարար Արմեն Մովսիսյանը։
Հայաստանը ծրագրում է ԱԷԿ-ի նոր բլոկ կառուցել մոտավորապես 1000 ՄՎտ հզորությամբ, և ՀՀ էներգետիկայի և բնական պաշարների նախարարության տվյալներով՝ այս նախագիծը կարող է մոտավորապես 5 միլիարդ դոլար արժենալ։
Նախագծի իրագործման համար օտարերկրյա կապիտալի ներգրավման նպատակով ՀՀ խորհրդարանը 2006թ.-ին օրենսդրորեն չեղյալ է համարել պետական նոր ատոմային բլոկերի սեփականության իրավունքի մենաշնորհը:
«ՏՏՀ-ն արդեն պատրաստ է, այդ փաստաթղթի վրա վերջին աշխատանքներն են տարվում, և շուտով տեխնիկատնտեսական հիմնավորման ողջ նյութը կհրապարակվի»,- չորեքշաբթի մամուլի ասուլիսի ժամանակ ասաց Մովիսյանը։
Միաժամանակ նախարարն ասաց, որ բացի ռուսական ընկերություններից, այլ ֆիրմաներ նույնպես հետաքրքրություն են դրսևորում և սպասում ՏՏՀ հրապարակմանը։
«Երբ փաստաթուղթը հրապարակվի, բոլորը կծանոթանան առաջ քաշված խնդիրներին, և մենք կմտնենք հետագա քայլերի քննարկումների առարկայական փուլ շահագրգիռ կողմերի հետ»,- ասաց նա։
Հայաստանն ու Ռուսաստանն ընթացիկ տարվա ապրիլին հաստատել են նոր ատոմային էներգաբլոկի շինարարությունն իրականացնող «Մեծամորէներգաատոմ» ռուս-հայկական բաժնետիրական ընկերության կանոնադրությունը: Սա իր տեսակով բաց ընկերություն կլինի, նրանում մասնաբաժինները կտեղաբաշխվեն 50/50 հարաբերակցությամբ։
Մովիսյանը նաև հայտնեց, որ այսօրվա դրությամբ մոտ 6-7 երկիր շահագրգռված է այս նախագծով։
Մեծամոր քաղաքում գործող հայկական ԱԷԿ-ը շահագործման է հանձնվել 1976-ին։ Ներկայում գործում է կայանի միայն երկրորդ բլոկը՝ 407,5 ՄՎտ հզորությամբ, որն արտադրում է Հայաստանի ողջ էլեկտրաէներգիայի 40-ից մինչև 50%-ը։ ԱԷԿ-ի ֆինանսական հոսքերը 2003-2013թթ. հանձնված են «ԻՆՏԵՐ ՌԱՈ ԵԷՍ» ՓԲԸ-ի հավատարմագրային կառավարմանը, որի սեփականատերը ռուսական «Ռոսատոմ» պետական կորպորացիան է։ Հայկական ԱԷԿ-ը, մասնագետների գնահատականներով, կարող է գործել մինչև 2016թ.-ը:-0-
