Մինչև ամռան վերջ հայ-ադրբեջանական հարաբերություններում որևէ արտառոց իրադարձություն տեղի չի ունենա, չորեքշաբթի մամուլի ասուլիսի ժամանակ հայտարարեց Կովկասի ինստիտուտի տնօրեն, քաղաքագետ Ալեքսանդր Իսկանդարյանը:
«Ոչ Ղազախստանում կայանալիք հանդիպման ժամանակ, ոչ էլ նախագահ Մեդվեդևի Հայաստան նախատեսված այցի ընթացքում, որը, իմ կարծիքով, լինելով աշխատանքային, կանդրադառնա միայն Հայաստանի և Ռուսաստանի փոխգործակցության և համագործակցության ոլորտին, որևէ բան չի ակնկալվում», - ասաց քաղաքագետը:
Իսկանդարյանի կարծիքով՝ ամռան ընթացքում ավելի շուտ ակտիվ աշխատանքի տպավորություն կստեղծվի: Վերջին իրադարձությունների՝ պետերբուրգյան հանդիպման և ղարաբաղաադրբեջանական գծում տեղի ունեցած դիվերսիայի լույսի ներքո՝ հայ-ադրբեջանական հարաբերությունները հեռանկար չունեն:
Հունիսի 18-ին ուշ երեկոյան Ադրբեջանից ԼՂՀ տարածք է ներթափանցել զինված դիվերսիոն խումբ: Ծավալված մարտի արդյունքում հակառակորդը հետ է քաշվել: Կան զոհեր և վիրավորներ: Ղարաբաղի կողմից զոհվել է չորս զինվոր, ևս չորսը վիրավորվել է: Ադրբեջանական կողմը մարտի դաշտում թողել է նվազագույնը մեկ զոհ:
«Սակայն չարժե սահմանի վրա տեղի ունեցող նման միջադեպերը համարել պատերազմի սկզբի նախագուշակներ: Այդ գործողություններն ուղղված են միայն համաշխարհային հանրությանը շանտաժի ենթարկելուն, Ադրբեջանի բնակչությանը հանգստացնելուն և, բնականաբար, հայկական կողմին վախեցնելուն», - նշեց քաղաքագետը:
Նրա խոսքեորով՝ Ադրբեջանի կողմից ամենաքիչը խելամիտ չէ պատերազմ սկսելը, քանի որ այսօր դրա համար որևէ ռացիոնալ հիմնավորում չկա:
Ղարաբաղյան հակամարտությունը սկսվել է 1988 թվականին, երբ գերազանցապես հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին: 1991թ. դեկտեմբերի 10-ին Լեռնային Ղարաբաղում հանրաքվե անցկացվեց, որի ժամանակ մասնակիցների 99,89 տոկոսը քվեարկեց Ադրբեջանից լիովին անկախանալու օգտին:
Դրան հետևեցին Ադրբեջանի ձեռնարկած լայնածավալ ռազմական գործողությունները, որոնք հանգեցրին նրան, որ նրանք կորցրեցին վերահսկողությունը ոչ միայն Լեռնային Ղարաբաղի, այլև հարակից յոթ շրջանների նկատմամբ:
1994թ. մայիսի 12-ին զինադադարի վերաբերյալ եռակողմ համաձայնագրի կնքումից հետո հակամարտության գոտում դադարեցին ռազմական գործողությունները, որոնց արդյունքում երկու կողմից էլ եղավ շուրջ 25-30 հազար զոհ և մոտ մեկ միլիոն մարդ ստիպված լքեց բնօրրանը:
Հրադադարի ռեժիմ հաստատելու վերաբերյալ համաձայնագիրը մինչ այսօր ուժի մեջ է: 1992 թվականից ի վեր հակամարտության խաղաղ կարգավորման ուղղությամբ բանակցություններ են տարվում ԵԱՀԿ Մինսկի խմբի շրջանակներում, որի համանախագահներն են ԱՄՆ-ն, Ռուսաստանը և Ֆրանսիան: -0-
