ԵՄ խորհրդատվական խմբի աշխատանքը պետք է դիվերսիֆիկացնել. ԱԽ

ԵՐԵՎԱՆ, 13 հուլիսի./Նովոստի-Արմենիա/. Ազգային անվտանգության խորհրդի քարտուղար, Հայաստան-Եվրամիություն համագործակցությունը համակարգող միջգերատեսչական հանձնաժողովի նախագահ Արթուր Բաղդասարյանը կարծում է, որ ԵՄ խորհրդատվական խմբի աշխատանքը պետք է դիվերսիֆիկացնել։

«Որպեսզի խորհրդատվական խմբի աշխատանքն առավել արդյունավետ լինի, անհրաժեշտ է դիվերսիֆիկացնել խմբի աշխատանքը, ապահովել աշխատանքի թափանցիկության առավել բարձր աստիճան»,- երեքշաբթի Բաղդասարյանի խոսքը մեջբերեցին ԱԽ քարտուղարի մամուլի ծառայությունից։

Հայաստանում Եվրամիության խորհրդատվական խմբի գործունեությունը գնահատող թիմի ղեկավար Իան Գրանդի հետ հանդիպման ժամանակ Բաղդասարյանը կարևորել է, որ հայկական փորձը կկիրառվի այլ երկրներում։

Նա նաև շնորհակալություն է հայտնել Հայաստան-Եվրամիություն համագործակցության գործողությունների ծրագրի իրականացման գործում ԵՄ խորհրդատվական խմբի` Հայաստանին ցուցաբերած աջակցության համար:

Իան Գրանդն ընդունել է Արթուր Բաղդասարյանի առաջարկը, որ Հայաստանը պետք է ոչ միայն խորհրդատուին ընտրելու իրավունք ունենա, այլ նաև կարողանա գնահատել նրա աշխատանքի արդյունավետությունը: Զրուցակիցները քննարկել են Հայաստան-Եվրամիություն համագործակցության գործողությունների ծրագրի իրականացման հետ կապված հարցեր:-0-