Տարեցտարի ՀՀ սփյուռքի նախարարության «Արի տուն» ծրագիրը, որի շրջանակներում սփյուռքահայ երիտասարդները Հայաստան են այցելում, ընդլայնում է իր աշխարհագրությունը, ուրբաթ մամուլի ասուլիսի ժամանակ ասաց ՀՀ սփյուռքի փոխնախարար Ստեփան Պետրոսյանը:
««Արի տուն» ծրագիրն անցկացվում է արդեն երկրորդ տարին և ավանդական է դառնում: Հունիսի 23-ից հուլիսի 7-ն անցկացված առաջին փուլում Հայաստան է այցելել 90 երիտասարդ: Հուլիսի 9-ից մեկնարկում է երկրորդ փուլը, որի ընթացքում Հայաստան կժամանի 117 երեխա», - նշեց Պետրոսյանը:
Նրա խոսքերով՝ ծրագրի միայն առաջին փուլում այս տարի Հայաստան են այցելել Կանադայի, Սիրիայի, ԱՄՆ-ի, Վրաստանի, Իրանի, Ռուսաստանի, Չեխիայի, Ավստրիայի մասնակիցները:
Նախորդ տարի ծրագրի շրջանակներում հայրենիք է այցելել 300 երեխա, այս տարի մասնակիցների թիվը կրկնակի ավելացել է:
«Հաջորդ տարի մենք ծրագրում ենք ավելի ընդլայնել աշխարհագրությունը և ծրագրում ներգրավել Լատինական Ամերիկայի երկրների, Ավստրալիայի երեխաներին», - նշեց փոխնախարարը:
Նա ընդգծեց, որ այս տարի ՀՀ պետբյուջեից «Արի տուն» ծրագրին հատկացվել է շուրջ 95 հազար դոլար, իսկ տրանսպորտային ծախսերը հոգում են մասնակիցների ծնողները:
«Ընտանիքները, որտեղ ապրում են երեխաները, նախապես ծրագրին մասնակցելու հայտ են ներկայացնում, ՀՀ սփյուռքի նախարարության ներկայացուցիչներն այցելում են նրանց տներ և համոզվում, որ այդ ընտանիքներում կան երեխաների բնակության համար անհրաժեշտ բոլոր պայմանները: Նախարարությունը ընտանիքներին գումար չի հատկացնում, նրանք երեխաներին պարզապես հյուրընկալում են», - նշեց Պետրոսյանը:
Նախարարի խոսքերով՝ Հայաստանի տեսարժան վայրեր այցելությունը կազմակերպում է Սփյուռքի նախարարությունը:
«Մեզ համար ծրագիրը կարևոր է նրանով, որ ամենատարբեր երկրներից Հայաստան են ժամանակում հայազգի երիտասարդներ, իրենց հետ բերում են իրենց մշակույթը, ինչպես նաև հաղորդակցվում են հայկական մշակույթի հետ: Գաղտնիք չէ, որ այդ երիտասարդները, բնակվելով հայրենիքից հեռու, հեռու են հայկական մշակույթից և հաճախ չեն տիրապետում մայրենի լեզվին: Այս ծրագիրը մասամբ լուծում է այս խնդիրը», - ավելացրեց նա:-0-
