ԵՐԵՎԱՆ, 9 հուլիսի. /Նովոստի-Արմենիա/. “Նշական” հրատարակչությունում լույս է տեսել Գիտության և մշակույթի ռուսական կենտրոնի գործադիր տնօրեն Աշոտ Ջիվանյանի “Շվի նվագելու մեթոդական դպրոց” գիրքը, հաղորդում է Հայաստանում Ռոսսոտրուդնիչվեստվոյի ներկայացուցչության մամուլի ծառայությունը:
“Ժողովածուն նախատեսված է երաժշտական դպրոցի սաների համար, սակայն կարող է նաև ուսումնական ձեռնարկ ծառայել այն մարդկանց համար, ովքեր առաջին անգամ եմ իրենց ձեռքն առնում այս ժողովրդական գործիքը և փորձում են վարպետության հասնել այս գործում”, - նշվում է տեղեկատվության մեջ:
Գիրքը նվիրված է հռչակավոր հայ կոմպոզիտոր Կոմիտասի 140 ամյակին: Ժողովածուի նյութը ներկայացված է միանգամից չորս լեզուներով (ռուսերեն, հայերեն, ֆրանսերեն և անգլերեն), ինչը թույլ կտա օգտվել ժողովածուից հայկական սփյուռքի ներկայացուցիչներին:
Վարժությունների, էտյուդների և գամմաների հետ մեկտեղ դասագրքում բացատրվում է երաժշտական տերմինների նշանակությունը, երաժշտական ստեղծագործությունների կատարման բնույթը:
Գրքի առանձին հատվածում նոտաներով ներկայացված են լավագույն ժողովրդական երգերն ու պարային ստեղծագործությունները, ռուս և արևմտաեվրոպացի կոմպոզիտորների ստեղծագործությունները:
Հավաքածուի նախաբանում արվեստի վաստակավոր գործիչ, պրոֆեսոր Արզաս Ոսկանյանը կարևորել է այս ձեռնարկի նշանակությունը, որը հնարավորություն է տալիս ավելի խորը ուսումնասիրել ժողովրդական գործիքը, նրա առանձնահատկությունները և նպաստում է տեխնիկական դժվարությունների հաղթահարմանը:
Գրքի հեղինակ Աշոտ Ջիվանյանը բազմաթիվ մրցույթների դափնեկիր է, երկար տարիներ համատեղում է աշխատանքը դասախոսական գործունեության հետ, Երևանի Սայաթ-Նովայի անվան երաժշտական դպրոցում գլխավորել է ժողգործիքների բաժինը: Ջիվանյանն աշխատել է ՀՀ մշակույթի նախարարությունում: 2009 թ.-ից աշխատում է Գիտության և մշակույթի ռուսական կենտրոնում:-0-
