Առողջության հայ-ամերիկյան կենտրոնում (Մամոգրաֆիայի կենտրոն) 2010 թ.-ի առաջին կիսամյակում հետազոտություն է անցել ավելի քան 10 հազար կին, նշեց կենտրոնի գործադիր տնօրեն Խաչանուշ Հակոբյանը:
«Միայն այս տարվա առաջին կիսամյակում հետազոտություն է անցել 10 հազար 200 կին, այն դեպքում, երբ ողջ նախորդ տարվա ընթացքում այդ թիվը կազմել է 15 հազար», - հինգաշբթի մամուլի ասուլիսի ժամանակ ասաց նա:
Կենտրոնի ղեկավարն ընդգծեց, որ կենտրոն հաճախելիության ավելացումը կապված է ոչ թե կրծքի քաղցկեղի հիվանդացության թվի աճի հետ, այլ պրոֆիլակտիկ նպատակներով հետազոտություն անցնելու հայ կանանց ավելացած ցանկության հետ:
Կրծքի քաղցկեղի վրա ազդող հիմնական գործոնների շարքում Հակոբյանը նշեց գենետիկան, ծանր սթրեսները, ոչ առողջ կենսակերպը (ալկոհոլի, ծխախոտի օգտագործում), անկանոն դաշտանն ու սեռական կյանքը, չափազանց շատ թվով ծննդաբերություններն ու ճարպակալումը:
«Կրծքագեղձի քաղցկեղն արտաքին ախտանիշներ չունեցող հիվանդություն է, այդ պատճառով յուրաքանչյուր կին պետք է տարին մեկ անգամ մամոգրաֆիկ հետազոտության ենթարկվի», - ընդգծեց նա:
Այս համատեքստում Հակոբյանն ափսոսանքով նշեց, որ կանանց մեծ մասը կենտրոն են դիմում` արդեն ունենալով որոշակի խնդիրներ կրծքի շրջանում:
Կենտրոնի գոյության 13 տարվա ընթացքում հետազոտության է ենթարկվել շուրջ 200 հազար հիվանդ, որոնցից 2 հազարի մոտ ախտորոշվել է առաջին և երկրորդ փուլի կրծքի քաղցկեղ, ինչի արդյունքում այդ կանանց հաջողվել է փրկել: Հակոբյանի խոսքերով` ևս 6 հազար կին գտնվում էին հիվանդացության երրորդ և չորրորդ փուլերում, երբ բուժումն արդեն անհնար է:
Առողջության հայ-ամերիկյան կենտրոնը (Մամոգրաֆիայի կենտրոն) ստեղծվել է 1997 թ.-ին, այն զինված է ամենաժամանակակից ախտորոշիչ սարքավորումներով: Կենտրոնում աշխատում են բարձրակարգ ռադիոլոգ-մասնագետներ, ովքեր ստաժավորում են անցել ԱՄՆ-ի տարբեր կլինիկաներում:-0-
