Գլենդեյլի քաղաքապետը պատրաստ է Բարի կամքի դեսպան դառնալ

Գլենդեյլի քաղաքապետ Արա Նաջարյանը ցանկություն է հայտնել հանդես գալ Բարի կամքի դեսպանի դերում՝ ամերիկահայ երիտասարդությանը դեպի Հայաստան գրավելու համար, որպեսզի նրանք հաղորդակից դառնան հայկական մշակույթին և ծանոթանան հայրենիքին։

«Ես մտադիր եմ ոգեշնչել Գլենդեյլի հայերին նրանով, ինչ որ տեսել եմ Հայաստանում, որպեսզի նրանք ժամանեն հայրենիք։ Եթե դու վերջին երկու տարիների ընթացքում չես եղել Հայաստանում, ապա դու ծանոթ չես Հայաստանին և Երևանին, որովհետև այստեղ շատ բան դեպի լավն է փոխվել»,- հինգշաբթի հայտարարեց նա Երևանում կայացած մամուլի ասուլիսի ընթացքում։

Նաջարյանն ասաց, որ իր ծնողները հաճախ էին Հայաստան և Լեռնային Ղարաբաղ գալիս, օգնում էին տեղի բնակիչներին Սպիտակի երկրաշարժի ժամանակ (1988 թվական) և իրեն են փոխանցել սերը հայրենիքի նկատմամբ։ Այդ պատճառով նա Հայաստան է գալիս իր 15-ամյա որդու հետ, ով ձգտում է ամառն անցկացնել Հայաստանում։

Նա նշեց, որ ինքն անձամբ Հայաստանում է անցկացնում արձակուրդը, բայց միաժամանակ մի քանի պաշտոնական հանդիպումներ է ունեցել, մասնավորապես, Հայաստանի սփյուռքի նախարար Հրանուշ Հակոբյանի հետ՝ քննարկելով «Արի տուն» ծրագիրը, որի շրջանակներում հանրապետությունում օտար երկրներից ժամանած ավելի քան 300 հայ է գտնվում։ -0-