Հայաստանում կարևոր խնդիր է դիտարկվում օտարերկրյա ուսանողների և սփյուռքահայերի ներգրավումը կրթական համակարգ. նախարար

Օտարերկրյա ուսանողների և սփյուռքահայերի ներգրավումը կրթական համակարգ կարևոր խնդիր է դիտարկվում Հայաստանում, հայտարարել է ՀՀ կրթության և գիտության նախարար Արմեն Աշոտյանը:

«Հաշվի առնելով ներկա ժողովրդագրական իրավիճակը` վերջին տարիներին ՀՀ բուհերում զգալի պակասել է ուսանողների թվաքանակը, և այդ համատեքստում օտարերկրյա ուսանողների և Սփյուռքի մեր հայրենակիցների ներգրավումը համակարգ կարևոր խնդիր է դիտարկվում», նշել է Աշոտյանը ճանաչողական այցով Հայաստանում գտնվող բելգիական ուսանողական ասոցիացիայի շուրջ 20 անդամ-ուսանողների հետ ունեցած հանդիպման ժամանակ:

Անդրադառնալով բարձրագույն կրթության համակարգին` Ա. Աշոտյանը նշել է, որ հաշվի առնելով ներկա ժողովրդագրական իրավիճակը` վերջին տարիներին ՀՀ բուհերում զգալի պակասել է ուսանողների թվաքանակը:

Ըստ նախարարի` ՀՀ-ում օտարերկրյա ուսանողների աշխարհագրությունը բավականին լայն է. մասնավորապես, ՀՀ բուհերում մեծ թիվ են կազմում ԻԻՀ, Հնդկաստանի, Չինաստանի, Սիրիայի, Լիբանանի քաղաքացիները, ովքեր հիմնականում ուսանում են բժշկական մասնագիտությունների գծով: Նախարարը նաև հավելել է, որ ՀՀ բուհերում բավականին մեծ է  սփյուռքահայ ուսանողների թվաքանակը, և ՀՀ-ն, իրավամբ, Սփյուռքի համար համարվում է  բարձրագույն կրթության կենտրոն:

ԿԳՆ տվյալներով, հանրապետության բուհերում ավելի քան 10 երկրից Հայաստան ժամանած շուրջ 2 հազար արտասահմանցի ուսանող է կրթություն ստանում:-0-