Հայ լրագրողների խոսքի ազատության սահմանափակումները շատ դեպքերում ունեն քաղաքական ենթատեքստ. Օմբուդսմեն
Հայ լրագրողների խոսքի ազատության սահմանափակումները շատ դեպքերում ունեն քաղաքական ենթատեքստ, չորեքշաբթի հայտարարեց ՀՀ մարդու իրավունքների պաշտպան Արմեն Հարությունյանը` ներկայացնելով «Խոսքի ազատության իրավունքը Հայաստանի Հանրապետությունում» արտահերթ հրապարակային զեկույցը:
Հարությունյանի խոսքերով` այս մասին խոսում է այն փաստը, որ խախտումների մեծամասնությունը (լրագրողների դեմ) արձանագրվում է նախընտրական քարոզչության կամ հենց ընտրությունների փուլում այս կամ այն թեկնածուի կամ նրա ներկայացուցիչների կողմից:
«Սա խոսում է այն մասին, որ երկրում դեռևս չի զարգացել ողջամիտ քաղաքական պայքար վարելու մշակույթը, և շատ հաճախ թեկնածուներն ընտրողների ձայները շահելու կամ դրանք չկորցնելու համար դիմում են ծայրահեղ քայլերի», - ասաց Օմբուդսմենը:
Նա նաև ավելացրեց, որ լրագրողների իրավունքների սահմանափակումներից շատերն օբյեկտիվ ու սուբյեկտիվ պատճառներով այդպես էլ չեն բացահայտվում կամ մեղավորները պատասխանատվության չեն ենթարկվում:
«Կարծում ենք` անպատասխանատվության մթնոլորտի հետևողական վերացումը Հայաստանում կբարելավի ոչ միայն խոսքի ազատության վիճակը, լրագրողների իրավունքների պաշտպանվածության մակարդակը, այլև խթան կհանդիսանա կառուպցիայի կրճատման, մարդու իրավունքների պաշտպանվածության, պետական մարմինների գործունեության արդյունավետության բարձրացման համար», - նշեց Հարությունյանը:
Միաժամանակ նա ավելացրեց, որ վերջերս լրագրողների իրավունքների խախտման դեպքերը կրճատվել են:
Մարդու իրավունքների պաշտպանի արտահերթ զեկույցը բաղկացած է հինգ բաժնից` «ՀՀ օրենսդրությունը խոսքի ազատության ոլորտում», «Խոսքի ազատության միջազգային չափանիշները», «Հայաստանում լրագրողների իրավունքների խախտումների ընդհանուր վերլուծություն», «Մամուլում խոսքի ազատության սահմանափակման դեպքերի վերլուծություն» և «Հեռուստատեսության և ռադիոյի ոլորտում խոսքի ազատության ընդհանուր վիճակը»:-0-
