ԵՐԵՎԱՆ, 1 հուլիսի. /Նովոստի-Արմենիա/. Հրամանատարների սխալը մեծ կորուստների հանգեցրեց Ղարաբաղում հունիսի 18-ին կազմակերպված ադրբեջանական դիվերսիայի ժամանակ, կարծում է ղարաբաղյան պատերազմի հերոս, Պաշտպանական մարզատեխնիկական միության նախագահ Արկադի Տեր-Թադևոսյանը (Կոմանդոս):
Հունիսի 18-ին ժամը 23-ն անց 30-ի սահմաններում Ադրբեջանի ԶՈՒ հատուկ նշանակության ջոկատայինները հատելով ղարաբաղաադրբեջանական զորքերի շփման գոտու հյուսիսարևելյան հատվածը։ Պաշտպանական թեժ մարտերի ընթացքում ղարաբաղյան կողմից զոհվել է չորս հոգի, ևս չորսը վիրավորվել են։ Ադրբեջանական ջոկատայինները կրելով կորուստներ՝ դիմել են փախուստի:
Նրա կարծիքով` սխալները բաց են թողնվել դասակի կամ վաշտի հրամանատարների կողմից, դիրքերը պահպանել են փորձ չունեցող զինվորներ, թուլացվել է ուշադրոթյունը և կորել զգոնությունը:
Միաժամանակ Թադևոսյանը նշեց, որ հետաքննության արդյունքում կբացահայտվեն միջադեպի մեղավորները:
«Սա դաս կլինի շատերի համար, և վերևում կանգնած հրամանատարությունը, իհարկե, հաշվի կառնի այս ամենը, եզրահանգումներ կանի` նման բան թույլ չտալու համար», - նշեց նա:
Գեներալը նաև ավելացրեց, որ նման միջադեպեր պարբերաբար տեղի են ունենում շփման գծի ողջ երկայնքով, և միշտ հարկավոր է զգոնություն ունենալ: Բացի դրանից, անհրաժեշտ է մշտապես համաշխարհային հանրության ուշադրությունը սևեռել Ադրբեջանի կողմից հրադադարի ռեժիմի խախտման վրա:-0-
