Անցյալ շաբաթ Ղարաբաղում տեղի ունեցած միջադեպը կրկին ընդգծեց ղարաբաղյան հակամարտության խաղաղ կարգավորման անհրաժեշտությունը, երկուշաբթի մամուլի ասուլիսի ժամանակ ասաց Հայաստանում Մեծ Բրիտանիայի Արտակարգ և լիազոր դեսպան Չարլզ Լոնսդեյլը։
Հունիսի 18-ի երեկոյան Ադրբեջանից զինված դիվերսիոն խումբը ԼՂՀ տարածք է ներխուժել՝ Չայլու գյուղի մերձակայքի հյուսիսարևելյան ուղղությամբ։ Հակառակորդը փախուստի է դիմել։ Ստեղծված կռվի արդյունքում ղարաբաղյան կողմից չորս մարդ է զոհվել, ևս չորսը վիրավորվել են։Ադրբեջանական կողմը կռվի դաշտում նվազագույնը մեկ զոհ է թողել։
«Ուժի կիրառումը կամ ուժի կիրառման սպառնալիքն անթույլատրելի է։ Մենք կոչ ենք անում հակամարտության երկու կողմերին զերծ մնալ դրանից։ Մենք ցավում ենք մարդկային զոհերի համար և մեր ցավակցությունն ենք հայտնում զոհված զինծառայողների ընտանիքներին»,- նշեց դեսպանը։
Լոնսդեյլը հույս հայտնեց, որ միջադեպը, որը տեղի է ունեցել հունիսի 19-ի գիշերը, վերջինն էր իր տեսակի մեջ։
«Ես չեմ կարծում, որ այս միջադեպը կարող է ռազմական գործողությունների ցերսկսման մեկնարկ դառնալ։ Սակայն չի կարելի թուլանալ, քանի որ ստատուս-քվոն մշտապես չի կարող պահպանվել։ Այդ պատճառով մենք կոչ ենք անում կողմերին ակտիվացնել բանակցությունները»,- ընդգծեց դեսպանը։
Ղարաբաղյան հակամարտությունը սկիզբ է առել 1988 թ.-ին, երբ հիմնականում հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին։
1991 թ. դեկտեմբերի 10-ին, Խորհրդային Միության փլուզումից մի քանի օր առաջ, Լեռնային Ղարաբաղում տեղի ունեցավ հանրաքվե, որի ժամանակ բնակչության ճնշող մեծամասնությունը՝ 99,89 տոկոսը Ադրբեջանից ամբողջովին անկախանալու կողմ քվեարկեց։
Դրանից հետո սկսվեցին լայնամասշտաբ ռազմական գործողություններ, որոնց հետևանքով Ադրբեջանը կորցրեց վերահսկողությունը Լեռնային Ղարաբաղի և նրան հարակից յոթ շրջանների նկատմամբ։
1994 թ.-ի մայիսի 12-ին՝ զինադադարի մասին համաձայնագրի ուժի մեջ մտնելուց հետո հակամարտության գոտում դադարեցին ռազմական գործողությունները։ Պատերազմի հետևանքով երկու կողմից զոհվեց մոտավորապես 25-30 հազ մարդ և մոտ մեկ միլիոնը ստիպված եղավ լքել բնակավայրերը։
Զինադադարի ռեժիմի մասին համաձայնությունը պահպանվում է մինչ այժմ։
1992 թ.-ից մինչ օրս ընթանում են բանակցություններ հակամարտության խաղաղ կարգավորման ուղղությամբ ԵԱՀԿ Մինսկի խմբի շրջանակներում, որի համանախագահներն են ԱՄՆ-ն, Ռուսաստանը և Ֆրանսիան։-0-
