Քուվեյթը հետաքրքրված է Հայաստանի հետ առևտրատնտեսական և մշակութային կապերի զարգացմամբ, ՀՀ ազգային ժողովի նախագահ Հովիկ Աբրահամյանի հետ հանդիպման ժամանակ ասաց Քուվեյթի պետության ֆինանսների նախարար Մուստաֆա Ջասեմ ալ-Շամալին, հաղորդում է ԱԺ մամուլի ծառայությունը։
«Ըստ նախարարի՝ միջխորհրդարանական հարաբերությունների խորացումը կնպաստի բոլոր բնագավառներում փոխգործակցության ակտիվացմանը, ըստ նրա՝ երկու երկրների քաղաքական դիրքորոշումները համընկնում են. երկու երկրներն էլ ձգտում են խաղաղության ու կայունության հաստատման ու ամրապնդման»,- ասվում է հաղորդագրության մեջ։
Հաղորդագրության համաձայն՝ իր հերթին Աբրահամյանը վերահաստատեց ՀՀ նախագահ Սերժ Սարգսյանի 2009թ. նոյեմբերին Քուվեյթ կատարած պաշտոնական այցի ընթացքում ձեռք բերված պայմանավորվածությունները իրականացնելու Հայաստանի պատրաստակամությունը։
Հայկական խորհրդարանի ղեկավարը վստահություն հայտնեց, որ նախարարի այցը Հայաստան նոր հնարավորություններ կբացի երկկողմ համագործակցության զարգացման համար և ողջունեց ներդրումների խրախուսման և փոխադարձ պաշտպանության համաձայնագրի ստորագրումը:
Աբրահամյանը նշեց, որ համաձայնագիրը կխթանի քուվեյթյան կապիտալի մուտքը, բարենպաստ պայմաններ կստեղծի երկու երկրների գործարարների համար տնտեսության ոլորտներում ներդրումներ կատարելու առումով:
Այս համատեքստում Հովիկ Աբրահամյանը կարևորեց բիզնես ֆորումների անցկացումը, գործարարների շփումները:
Հանդիպման ընթացքում կողմերը անդրադարձան տարածաշրջանային խնդիրներին, հայ-թուրքական հարաբերությունների կարգավորման հնարավորություններին, ղարաբաղյան հիմնախնդրին` համոզմունք հայտնելով, որ 21-րդ դարում հակամարտությունների խաղաղ, բանակցային ճանապարհով կարգավորումը այլընտրանք չունի, և ուժի կիրառումը ու ռազմատենչ հայտարարությունները չեն կարող նպաստել հիմնախնդիրների լուծմանը: -0-
