Կլաուդիա Կարդինալեն կմասնակցի Երևանի «Ոսկե ծիրան» փառատոնի բացմանը

ԵՐԵՎԱՆ, 25 հունիսի. /Նովոստի-Արմենիա/. Համաշխարհային կինոյի աստղ, իտալացի դերասանուհի Կլաուդիա Կարդինալեն կմասնակցի հուլիսի 11-18-ը անցկացվող «Ոսկե ծիրան» յոթերորդ միջազգային կինոփառատոնի բացմանը, ասաց փառատոնի միջազգային ծրագրի կազմակերպիչ Տաթևիկ Մանուկյանը:

«Ոսկե ծիրան» երևանյան յոթերորդ միջազգային կինոփառատոնը կբացի մեծանուն ֆրանսահայ կինոռեժիսոր Անրի Վեռնոյի «Մայրիկ» (1991 թ.) ֆիլմի հետահայց ցուցադրությունը, որում գլխավոր դերը խաղացել է Կլաուդիա Կարդինալեն: Ֆիլմը պատմում է Օսմանյան կայսրությունում Հայոց ցեղասպանությունից մազապուրծ հայկական ընտանիքի մասին, որը տեղափոխվել է Մարսել:

«Կլաուդիա Կարդինալեն ներկա կլինի փառատոնի բացման արարողությանը: Դա մեր մեծ անակնկալն է հանդիսատեսին… Նա կներկայացնի ֆիլմի հետահայաց ցուցադրությունը ֆիլմի ռեժիսորի որդի Պատրիկ Մալաքյանի և պրոդյուսեր Ալեն Թերզյանի հետ միասին», - ասաց Մանուկյանը:

Այս կապակցությամբ «Ոսկե ծիրանի» ծրագրերի տնօրեն Միքայել Ստամբոլցյանը նշեց, որ Կարդինալեն կարժանանա «Համաշխարհային կինեմատոգրաֆի մեջ ունեցած ներդրման համար» մրցանակին, իսկ Վեռնոյը մեծագույն վարպետության համար հետմահու կարժանանա «Փարաջանովի թալեր» մրցանակին. դա արծաթե մետաղադրամների պատճեն է, որոնց վրա ռեժիսորը՝ գտնվելով բանտում, նկարներ է փորագրել:

«Ոսկե ծիրան» միջազգային ամենամյա կինոփառատոնը տարածաշրջանում ամենահեղինակավոր փառատոններից մեկն է և անցկացվում է 2004 թ.-ից: «Ոսկե ծիրան» յոթերորդ կինոփառատոնը կանցկացվի Երևանում հուլիսի 11-18-ը, որի շրջանակներում կներկայացվեն ավելի քան 100 ֆիլմեր աշխարհի 62 երկրներից:-0-