ՀԱՊԿ շրջանակներում Հայաստանն ընդլայնում է համագործակցությունը ՌԱՀ ոլորտում. ԱԽ

Հայաստանը կզարգացնի համագործակցությունը ՀԱՊԿ գործընկերների հետ՝ նպատակաուղղված ռազմարդյունաբերական համալիրի ամրապնդմանը,  հայտնեց ՀՀ Ազգային անվտանգության խորհրդի քարտուղար Արթուր Բաղդասարյանը։

«Արդեն մի շարք այցեր են կայացել, հստակ համաձայնագրեր են ձեռք բերվել։ Մոտակա կես տարվա ընթացքում այս ուղղությամբ վեց կարևորագույն միջոցառումներ կիրականացվեն»,- ուրբաթ մամուլի ասուլիսի ժամանակ նշեց ԱԽ քարտուղարը։

Ըստ նրա՝ Հայաստանում ՀԱՊԿ հետ համագործակցության շրջանակներում կիրականացվի ռազմարդյունաբերական համալիրի զարգացման առաջին փորձնական ծրագիրը։

 «ՀԱՊԿ երկրների ռազմարդյունաբերական ձեռնարկությունների միջև կապերի խորացման ուղղությամբ քայլեր կձեռնարկվեն, ինչպես նաև կարդիականացվեն ՀԱՊԿ օպերատիվ արձագանքման կոլեկտիվ ուժերը»,- հայտնեց Բաղդասարյանը։

Նա մատնանշել է ՀԱՊԿ շրջանակներում Հայաստանի ակտիվ գործունեությունը։ «ՀԱՊԿ-ում ՀՀ նախագահության ժամանակ 2008թ.-ի սեպտեմբերից մինչև 2009թ.-ի հունիսը, կազմակերպությունը մի շարք կարևոր փաստաթղթեր է ընդունել։ Մասնավորապես կարևոր որոշում է ընդունվել, որ ՀԱՊԿ ցանկացած անդամի հանդեպ ագրեսիան դիտարկվում է որպես ամբողջ Կազմակերպության հանդեպ ագրեսիա»,- ավելացրեց ԱԽ քարտուղարը։

1992թ.-ի մայիսին ստեղծված ՀԱՊԿ մասնակիցները յոթ պետություններ են՝ Հայաստանը, Բելառուսը, Ղազախստանը, Ղրղզստանը, Ռուսաստանը, Տաջիկստանը և Ուզբեկստանը։ -0-