Հայկական բանակը պատրաստ է ղարաբաղյան հակամարտության ցանկացած զարգացուման. Անվտանգության խորհուրդ

Հայաստանի Զինված ուժերը գտնվում են հիանալի մարտական վիճակում և պատրաստ են ղարաբաղյան հակամարտության զարգացման ցանկացած սցենարի, հայտարարել է ՀՀ Ազգային անվտանգության խորհրդի քարտուղար Արթուր Բաղդասարյանը:

«Հայաստանը հակամարտության խաղաղ կարգավորման կողմնակիցն է, սակայն ինչպես հայտնի է, «ցանկանում ես խաղաղություն, պատրաստվիր պատերազմի»: Քանի դեռ հակամարտությունն ամբողջովին կարգավորված չէ, մենք պետք է պատրաստ լինենք ցանկացած իրադարձության», - ուրբաթ մամուլի ասուլիսի ժամանակ ասաց Բաղդասարյանը:

Նրա խոսքերով՝ Հայաստանը պատրաստ է հասնել հակամարտության արժանի և արդար լուծման՝ պահպանելով երեք պարտադիր պայմաններ՝ ԼՂՀ կարգավիճակի հստակեցումը, Հայաստանի և ԼՂՀ-ի միջև ուղիղ ցամաքային կապի ապահովումը, Ղարաբաղի ժողովրդի անվտանգության երաշխիքների առկայությունը:

Ղարաբաղյան հակամարտությունը սկսվել է 1988 թվականին, երբ գերազանցապես հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին: 1991թ. դեկտեմբերի 10-ին Լեռնային Ղարաբաղում հանրաքվե անցկացվեց, որի ժամանակ մասնակիցների 99,89 տոկոսը քվեարկեց Ադրբեջանից լիովին անկախանալու օգտին:

Դրան հետևեցին Ադրբեջանի ձեռնարկած լայնածավալ ռազմական գործողությունները, որոնք հանգեցրին նրան, որ նրանք կորցրեցին վերահսկողությունը ոչ միայն Լեռնային Ղարաբաղի, այլև հարակից յոթ շրջանների նկատմամբ:

1994թ. մայիսի 12-ին զինադադարի վերաբերյալ եռակողմ համաձայնագրի կնքումից  հետո հակամարտության գոտում դադարեցին ռազմական գործողությունները, որոնց արդյունքում երկու կողմից էլ եղավ շուրջ 25-30 հազար զոհ և մոտ մեկ միլիոն մարդ  ստիպված լքեց բնօրրանը:

Հրադադարի ռեժիմ հաստատելու վերաբերյալ համաձայնագիրը մինչ այսօր ուժի մեջ է: 1992 թվականից ի վեր հակամարտության խաղաղ կարգավորման ուղղությամբ բանակցություններ են տարվում ԵԱՀԿ Մինսկի խմբի շրջանակներում, որի համանախագահներն են ԱՄՆ-ն, Ռուսաստանը և Ֆրանսիան: -0-