Միջազգային հանրությունը պետք է Ադրբեջանին «դեղին քարտ» ցույց տա, հայտարարել է ՀՀ ԱԳ նախարար Էդվարդ Նալբանդյանը Ղարաբաղի և Ադրբեջանի Զինված ուժերի շփման գծում վերջերս տեղի ունեցած սադրանքի կապակցությամբ:
Հունիսի 18-ի երեկոյան Ադրբեջանի հատուկ ջոկատայինները ներխուժել են Լեռնային Ղարաբաղի Հանրապետության տարածք: Թշնամին հետ է շպրտվել: Ծավալված մարտի հետևաքով ղարաբաղյան կողմից չորս զինվոր է զոհվել, ևս չորսը վիրավորվել է: Ադրբեջանական կողմը մարտի դաշտում մեկ սպանված է թողել:
«Միջազգային հանրության հայտարարություններն ու կոչերը առաջին հերթին վերաբերում են Ադրբեջանին: Կարծում եմ, որ դրանք կարող են Ադրբեջանի համար դեղին քարտ դառնալ», - ուրբաթ Ավստրիայի եվրոպական ու միջազգային հարցերի դաշնային նախարար Միխայել Շպինդելեգերի հետ համատեղ մամուլի ասուլիսի ժամանակ ասել է Նալբանդյանը:
Միաժամանակ նա կարևոր է համարել բացահայտ կերպով անվանել այն մարդկանց անունները, ովքեր պատասխանատություն են կրում նման իրավիճակներում:
«Չխրախուսելու համար նրանց, ովքեր ռազմատենչ հայտարարություններ են անում, մերժում են հրադադարի ռեժմի ամրապնդման առաջարկները, կոպտորեն խախտում են այդ ռեժիմի չխախտման պայմանավորվածությունը, հրաժարվում են դուրս բերել դիպուկահարներին շփման գծից, սադրանքներ են կազմակերպում և բանակցային գործընթացը ձախողելու ակնհայտ փորձեր են անում, ավելի ճիշտ կլիներ խոսել անուններով և ասել, թե ով է պատասխանատու», - ասաց Նալբանդյանը:
ՀՀ ԱԳ նախարարի խոսքերով՝ հայտարարությունների հեղինակներն ակնհայտ կերպով հասկացնում են, թե ում են այդ հայտարարությունները հասցեագրված, քանի որ Հայաստանը չէ, որ ռազմատենչ հայտարարություններ և պատերազմի կոչեր է անում:
«Հայաստանը չէ, որ նման սադրանք է կազմակերպել սահմանի վրա՝ անցնելով Ղարաբաղի Հանրապետության տարածք: Հայաստանը չէ, որ հրաժարվել է հրադադարի ռեժիմի ամրապնդման առաջարկից, որն արվել է ԵԱՀԿ-ի կողմից, Հայաստանը չէ, որ հրաժարվել է դուրս բերել դիպուկահարներին», - պարզաբանեց նա:
Այս կապակցությամբ Նալբանդյանը ընդգծեց, որ Բաքուն բավականին ակնհայտ կերպով փորձում է կրոնական երանգ հաղորդել այս խնդրին, ինչը «շատ վտանգավոր է»: «Ադրբեջանը փորձում է իր ավանտյուրաների մեջ ներգրավել իսլամական երկրներին, այս տեսակետից միջազգային հանրությունը պետք է հստակ դիրքորոշում արտահայտի», - ասաց ՀՀ ԱԳ նախարարը:
Նրա խոսքերով՝ դա անհրաժեշտ է, որպեսզի Ադրբեջանի մոտ տպավորություն չստեղծվի, թե միջազգային հանրությունը կարող է ըմբռնումով վերաբերվել նման տիպի ոտնձգություններին և ռազմատենչ մոտեցումներին:
Ղարաբաղյան հակամարտությունը սկսվել է 1988 թվականին, երբ գերազանցապես հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին: 1991թ. դեկտեմբերի 10-ին Լեռնային Ղարաբաղում հանրաքվե անցկացվեց, որի ժամանակ մասնակիցների 99,89 տոկոսը քվեարկեց Ադրբեջանից լիովին անկախանալու օգտին:
Դրան հետևեցին Ադրբեջանի ձեռնարկած լայնածավալ ռազմական գործողությունները, որոնք հանգեցրին նրան, որ նրանք կորցրեցին վերահսկողությունը ոչ միայն Լեռնային Ղարաբաղի, այլև հարակից յոթ շրջանների նկատմամբ:
1994թ. մայիսի 12-ին զինադադարի վերաբերյալ եռակողմ համաձայնագրի կնքումից հետո հակամարտության գոտում դադարեցին ռազմական գործողությունները, որոնց արդյունքում երկու կողմից էլ եղավ շուրջ 25-30 հազար զոհ և մոտ մեկ միլիոն մարդ ստիպված լքեց բնօրրանը:
Հրադադարի ռեժիմ հաստատելու վերաբերյալ համաձայնագիրը մինչ այսօր ուժի մեջ է: 1992 թվականից ի վեր հակամարտության խաղաղ կարգավորման ուղղությամբ բանակցություններ են տարվում ԵԱՀԿ Մինսկի խմբի շրջանակներում, որի համանախագահներն են ԱՄՆ-ն, Ռուսաստանը և Ֆրանսիան: -0-
